Kreshnik Spahiu fiton bastin publik

Në emisionin “Top Story” në “Top Channel”, Kreshnik Spahiu deklaroi mbrëmë se, në qoftë se Gjykata Kushtetuese nuk do të rrëzonte sot ligjin aktual të gjendjes civile (i cili përcakton nocionet e kombësisë së qytetarëve dhe procedurat e ndryshimit të saj), ai do të jepte dorëheqjen nga Këshilli i Lartë i Drejtësisë. Sot gjykata vendosi ta rrëzojë këtë ligj me një votë 6-2. Në këtë mënyrë, Spahiu kurorëzon me sukses një nga betejat e tij më të rëndësishme publike, që kur u përfshi në “Aleancën Kuq e Zi”. Nga ato që tha mbrëmë në “Top Story” dhe mënyra sesi i tha, duket se Spahiu po ideon krijimin e një partie të re, pa pjesëmarrjen e politikanëve të karrierës, e cila mund të konkurojë në zgjedhjet e ardhshme.

Çështja e ligjit të gjendjes civile u ngrit nga gjykatat e rretheve Sarandë, Shkodër dhe Përmet, të cilat kërkuan prej anëtarëve të Gjykatës Kushtetuese shpalljen si të papajtueshëm me nenet 19 e 20 të Kushtetutës së Republikës së Shqipërisë të termit "kombësia" të përcaktuar në nenin 6/1 dhe 8 të ligjit nr. 10129, datë 11.05.2009 "Për gjendjen civile", të termit "kombësinë, në përputhje me kombësinë e prindërve", të përcaktuar në nenin 42/2 germa "e" të ligjit nr. 10129, datë 11.05.2009 "Për gjendjen civile", si dhe të nenit 58 të ligjit nr. 10129, datë 11.05.2009 "Për gjendjen civile".

Në pretendimin e tyre, tre gjykatat e shkallës së parë në vendin tonë shprehen se ligji për Gjendjen Civile cënon rëndë parimet kushtetuese duke detyruar shtetasit shqiptarë që të deklarojnë përkatësinë e tyre etnike. Gjatë kësaj kohe, këto gjykata kanë pezulluar edhe çështjet që kanë në shqyrtim deri sa gjykata Kushtetuese të shprehej në lidhje me elementin e kombësisë.

E.Z.