Greqia, një demokraci e stilit ballkanik

Greqia është pa diskutim një demokraci që ngjan fare pak me demokracitë e klubit të BE-së. Është një demokraci e stilit ballkanik. Ka mjaft prova që flasin në favor të kësaj teze, por vendimi i sotëm i kryeministrit Papandreu për të bërë një spastrim në rangjet më të larta të ushtrisë, të marinës e të aviacionit tregon për brishtësinë e institucioneve e të strukturave, të cilat duhet të jenë të qëndrueshme e jashtë ndikimit të tekave të ekzekutivit. Ky është një vendim që nuk pritej, sidomos pas vendimit tjetër të marrë disa orë më parë (lidhur me referendumin mbi marrëveshjen Greqi-BE), nëpërmjet të cilit u provokua një shock në të gjithë Europën.

Nga brenda maxhorancës po thuhet për të qetësuar gjakrat, se “një gjë e tillë ishte në axhendë prej kohësh”, por opozita është ngacmuar keq. “Ikët, morët fund, prandaj lërini rehat forcat e armatosura”, tha sot Margaritis Tzimas, ministri i mbrojtjes në hije, në emër të Demokracisë së Re.

Mirëpo ka një interpretim tjetër, që bëhet nga analistët gjakftohtë të Athinës. “Në rrethanat  e një votbesimi të premten (është një vendim i marrë, tanimë), e në rrethanat kur qeveria është me sot, me nesër, Papandreu po bën atë që kanë bërë tradicionalisht qeveritë greke në prag të rënies së tyre e të ndërrimit të pushtetit, dmth po ndërron zinxhirin e komandave në Forcat e Armatosura në mënyrë që në opozitë të mos i ketë kundër struktura të tilla”, thonë vëzhguesit atje.

Greqia është Ballkan e s’e luan as topi.

M.N.