Greqi, Itali: krizat tek dera e shtëpisë

Italia dhe Greqia janë dy të sëmurat e Europës në këtë moment. Berlusconi-t po i ikin dhe të vetët (dy deputetë kaluan dje me Casini-n), gjë që s’mund të përfytyrohej deri disa javë më parë. Një numër deputetësh të tjerë që e kanë mbështetur gjithë kohën i kërkojnë përgjigje mbi pyetjen: “Çfarë mund të bësh me këtë maxhorancë të dobët? I bën dot reformat që të kërkohen nga Brukseli e që mund ta nxjerrin Italinë nga kjo gropë?” Përgjigjja dihet, që jo. Por Berlusconi po bën një provë me një paketë reformash, e cila do duhet të kalojë në harkun e 15 ditëve në të dy dhomat e parlamentit. Nëse nuk kalon, Berlusconi bie. Dhe komandën e gjërave e merr Presidenti Napolitano. Sipas shumë gasave, do shkohet në zgjedhje të parakohshme. Dhe do të jetë kohë e humbur, që mund t’u kushtojë italianëve.

Në zgjedhje të parakohshme po shkohet edhe në Greqi, por nëse për Italinë zgjedhjet e parakohshme janë një luks që italianët edhe mund t’ia lejojnë vetes, për Greqinë mund të qëllojë të jenë katastrofike. Greqia nuk mund të durojë dot as tri-katër javë pa një qeveri të fortë që t’u dalë gjërave zot, e në këtë kuptim një fushatë elektorale në këto momente do të ish me pasoja të paimagjinueshme. Mjaft të mendosh që arka e shtetit ka pará deri nga mesi i dhjetorit. Papandreu e di këtë, dhe ka bërë një prapakthehu për punë të referendumit. Ka premtuar se do të takohet me leader-in e opozitës, Samaras, dhe me të do të kërkojë një konsensus të gjerë mbi gjërat që duhen bërë. Nëse s’merren vesh, ditë shumë të këqija kanë për të ardhur.

M. Nano