Giallo amerikane: S’po gjendet se kush ka folur në emër të DASH-it

Ka dy-tri ditë që flitet mbi një deklaratë të “njërit prej zëdhënësve të Departamentit Amerikan të Shtetit”, në të cilën bëhej distancimi prej qëndrimeve të një diplomati në pension e përgënjeshtroheshin këto qëndrime!!!!! Kjo histori ka formën e një giallo-je. Askush nuk po i del për zot asaj deklarate, dhe nuk po gjendet emri i zëdhënësit. Ambasada amerikane në Tiranë, si kurrë më parë, duket pak si e shushatur, aq sa të jep përshtypjen se është futur në kurth “nga shefat atje lart”, e prandaj nuk di se ç’emër t’i vërë kësaj që ka ndodhur.

Është një lajm me pak rreshta i Shqipit të sotëm, i futur si me pahir në faqen 5 (në fakt, është lajmi më i rëndësishëm i javëve të fundit), që demonstron pikërisht këtë gjë. Gazetarët e kësaj të përditshmeje kanë kërkuar një sqarim nga shefja e Zyrës së Çështjeve Publike në ambasadën amerikane, Elizabeth Lewis, por kjo e fundit nuk ka bërë gjë tjetër, veçse ka thënë në thelb që “diplomati në pension Withers nuk ka tagër të flasë në emër të DASH-it, dhe se këtë tagër e ka Arvizu-ja”. Mirëpo kuptohet, s’na thotë ndonjë gjë të madhe me këtë. Është sikur të na thotë se “e hëna vjen pas të djelës”. Për të qenë korrekt, ja një pjesë e lajmit të Shqipit, gërmë për gërmë: “Pyetjes se cili prej zëdhënësve të DASH-it e ka bërë deklaratën e publikuar nga një pjesë e shtypit shqiptar, ajo i është shmangur, duke këmbëngulur në mesazhin që pikëpamjet zyrtare e qëndrimet zyrtare të DASH-it shprehen vetëm nëpërmjet ambasadorit ammerikan”.

Duket se proçkën e ka bërë dikush ‘pa emër’ në DASH a në Washington, dhe ambasadës amerikane të këtushme i duhet të bëjë çmos që ta mbyllë këtë histori me kaq. Kështu duket.

M.N.