Etika parlamentare: "Pa hë, o Flamur”, “po lëri këto, tani”, “mor mik”, etj, etj.

Në komisionin parlamentar të ekonomisë, që u mblodh dje për të intervistuar Sali Shehun si kandidat presidencial për postin e kryetarit të KLSH-së, u zhvillua një diskutim tepër i shpenguar, e herë-herë nervoz, në stil mejhanesh. Ndërhyrjet e zbardhura nga gazetarët ishin larg çdo etike parlamentare; binin në sy fraza të llojit “pa hë, o Flamur”, “lëri këto, tani”, “o Mondi, o zotëri”, “fali o Zot se s’dinë se çfarë bëjnë” (në këtë rast është Sali Shehu që i referohet Jezu Krishtit), “më dëgjo këtu një sekondë”, “o Flamur, por ti më ke mbajtur banderolat në shtëpi, o burrë”, “dëgjo ti Mondi”, “mor mik”, etj, etj.

E paparë ish ndërhyrja finale e kandidatit Shehu, kur po shihte se demokratët po e refuzonin: “Pse më thotë miku im, Sali Berisha, të jap dorëheqjen? Se më 14 shtator dola nga zyra dhe shkova i thashë se duhet të mbroj shtetin dhe braktisa familjen time? Apo se isha me një çadër në dorë në varrimin e Azem Hajdarit? Apo se bëra 13 muaj burg? Apo se fitova dy beteja të rëndësishme [elektorale] në Dibër? Apo se fitova dy beteja të rëndësishme në emër të PD-së? Apo se fitova në Bulqizë? Apo se kam qenë për tetë vjet anëtar i një komisioni të rëndësishëm [Komisioni i Ligjeve]? Jo, nuk është kjo. [Është sepse unë] jam mik i Bamir Topit dhe këtë e kam nder të madh. Por unë kam ngrënë bukë më pak se të tjerët në shtëpinë e tij.”

Pas kësaj u votua kundër kandidaturës së Shehut. Pati një abstenim  të një Shehu tjetër, Sherefedinit. “E kam kushëri”, tha ai më pas, “por në seancë do votoj si t’më thotë partia”.

M.N.