Edit Harxhit i shkon mendja të mbahet me të madh; pa sukses

Ka një kulturë këtejpari, që mund të emërtohej kultura e arrogancës së pushtetit, e që me fjalë më të varfëra don të thotë se njerëzit me ofiqe e me poste i japin të drejtë vetes, duke u mirëkuptuar dhe nga gjindja rretherrotull, të shkelin apo shpërfillin rregullat. Duhet thënë se në përgjithësi iu ecën.

Por nuk i ka ecur zv.ministres së jashtme, Edit Harxhit. Nuk i ka ecur të paktën në një rast. Dje, në pritjen e ambasadës austriake në Tiranë, e cila mbahej në Hotel Rogner, të ftuarit ishin vënë në radhë për të hyrë. Papritur, sytë e të gjithëve drejtohen nga në grua e shkurtër, që e lë radhën dhe pa pikë turpi çapitet në drejtim të portës së hyrjes, ku e prêt buzagaz dikush i ngarkuar me protokollin e mbrëmjes. Dhe do kish hyrë serbes-serbes sikur në radhë të mos kish qëlluar Edi Rama, me të shoqen. Rama ka dalë nga rreshti dhe i është drejtuar robit të protokollit me fjalët (sipas Shekullit): “Kush je zotrote që e bën këtë dhe kush është kjo zonja që u futka pa radhë kur gjithë këta të ftuar presin në këmbë radhën?”

Gangsteri i protokollit u turpërua, apo bëri sikur u turpërua, ndërsa aja gangsterja tjetër nuk u pa më. U kthye andej nga erdhi e shoqëruar nga një atmosferë gallate, që u krijua vetvetiu.

M.N.