Berisha: Aksidentet një problem i madh. Në fakt, janë një problem SHUMË i madh

Kryeministri Berisha ka deklaruar sot se dhënia e patentave personave që nuk kanë aftësitë e nevojshme për të drejtuar një automjet është një nga shkaqet kryesore të aksidenteve në vendin tonë. Duke folur në ceremoninë e përurimit të sistemit të ri elektronik për patentat dhe targat e automjeteve, në Drejtorinë e Përgjithshme të Transportit Rrugor, ai tha: “Shqipëria është cilësuar vend me numër të lartë aksidentesh, çka do të thotë se duhet të bëjmë një përballje shumëplanëshe me këtë çështje shumë të dhimbshme”.

Në fakt, Shqipëria nuk është vend me numër të lartë aksidentesh; është vend me numër SHUMË të lartë aksidentesh.

Në Shqipëri, ndodhin mesatarisht 6 aksidente çdo 5 ditë. E përkthyer në një numër të krahasueshëm me vendet e tjera, kjo statistikë do të thotë se në Shqipëri ndodhin 21 aksidente për 10.000 automjete, ose 3.6 herë më shumë se në vendet ish-komuniste e 11 herë më shumë se në Suedi. Dhe ç’është më e keqja, gjysma e aksidenteve automobilistike shqiptare përfundojnë me vdekjen e të paktën njërës prej viktimave - një rekord absolut evropian.

Në bazë të një studimi që kam kryer rreth aksidenteve në Shqipëri më ka rezultuar se, në qoftë se të gjithë njerëzit që udhëtojnë me automjete përdorin rripin e sigurisë, numri i vdekjeve nga aksidentet pakësohet pothuajse 45% e numri i plagosjeve të rënda pakësohet me 28%. Përkthyer në gjuhën ekonomike, kjo do të thotë se efekti në koston totale të aksidenteve do të ishte një ulje rreth 30%. Në mënyrë të ngjashme, në qoftë se shpejtësia mesatare e ngarjes së automjeteve në të gjithë vendin ulet me 5 km/orë, numri i aksidenteve, e për rrjedhim edhe kostoja totale e tyre, do të ulej 25%. Ndërsa një përgjysmim i numrit të shoferëve të pirë do të ndikonte në një reduktim prej 25% të faturës që shoqëria shqiptare paguan për aksidentet automobilistike.

Për të shpëtuar jetë njerëzish dhe për t’i realizuar shoqërisë kursime si të mësipërmet, qeverisë i duhet të bëjë vetëm shpenzime modeste për zbatimin rigoroz të rregullores së qarkullimit rrugor dhe për fushatën e ndërgjegjësimit të publikut. Ose thënë ndryshe, i duhet ta vrasë më tepër mendjen për jetën dhe mirëqenien e shtetasve të vet.

E. Zaloshnja