Zgjedhjet, 1.2 milionë USD. KQZ sot miraton buxhetin

TIRANE- Komisioni Qendror i Zgjedhjeve pritet te miratoje ne mbledhjen e sotme buxhetin e detajuar per zgjedhjet e qershorit. Zgjedhjet e përgjithshme të 23 qershorit do t’i kushtojnë buxhetit të shtetit rreth 123 milionë lekë ose 1.2 milionë dollarë.

Në buxhetin e KQZ-së nuk janë parashikuar shpenzimet që do të bëhen për blerjen e dy projekteve teknologjike, atë të verifikimit të kartave të identitetit që do të përdoret në qarkun e Tiranës (SEV) dhe numërimin elektronik, projekt që do të zbatohet në qarkun e Fierit (SEN).

Zërin kryesor të buxhetit për Komisionin Qendror të Zgjedhjeve e zënë shpenzimet për paga, rreth 52% e totalit prej 123 milionë lekësh. KQZ ka parashikuar të paguajë rreth 64 milionë lekë për pagat e komisionerëve dhe gjithë administratës së zgjedhjeve.

Rreth 17 milionë lekë do të jetë kosto e bazës materiale, ku përfshihen blerja e 3 mijë kutive të reja dhe 40 mijë kodet e sigurisë rezervë, që u miratuan javën e shkuar me vendim unanim nga shtatë anëtarët e KQZ-së.

Administrata zgjedhore ka llogaritur gjithashtu rreth 1.2 milionë lekë shpenzime për marrjen me qira të ambienteve të votimit që do të përdoren më 23 qershor.

PANORAMA