Siguria rrugore, Haxhinasto dhe Tahiri prezantojnë paketën e re ligjore

TIRANE-Ministri i Transporteve, Edmond Haxhinasto dhe Ministri i Brendshëm, Saimir Tahiri prezantuan sot një paketë masash ligjore për rritje e sigurisë rrugore.

Në një konferencë për shtyp nga selia e kryeministrisë, Haxhinasto tha se kemi përgatitur një sërë propozimesh për ndryshime në  Kodin rrugor dhe Kodin Penal.

Haxhinasto bëri të ditur se do forcojmë kontrollin e mjeteve, do bëjmë sistemin të pathyeshëm nga korrupsioni që ekziston sot dhe do vendosim elementë sigurie.

Gjithashtu, ai tha se do të kemi rikonceptim të elementëve të testimit për drejtuesit e automjeteve si dhe ndërhyrje në sinjalistikë.Paketa tha ai, përfshin edhe reformën në transportin publik. Nga ana e tij, Ministri Tahiri tha se paketa e masave ligjore për sigurinë rrugore synon garantimin e jetës së qytetarëve.Duke vënë në dukje se aksidentet rrugorë janë në shifra alarmante, Tahiri deklaroi se nuk do të lejojmë shkeljet ligjore nga punonjësit e policisë.

“Kemi parashikuar propozimin për ndryshim si masë minimale të dënimit pa leje drejtimi 10 ditë heqje lirie . Sepse të drejtosh mjetin pa leje drejtimi dhe në gjendje të dehur nuk është shkelje e kodit rrugor por përbën vepër penale. Ndaj si e tillë Ministria e Brendshme ka prezantuar që dënimi minimal i mundshëm të jetë 10 ditë heqje lirie.  Për statistikë në 4 muaj që nga  dita e parë të ushtrimit të detyrës policia filloi praktikën e arrestimit të personave të cilët drejtojnë automjetin në gjendje të dehur dhe ky numër është 660 shtetas të ndalur por që 83 persona janë dhënë vendimet nga gjykatat” tha Tahiri.