Itali, paketë masash antikrizë në vlerë 33 miliardë euro

Kryeministri italian, Mario Monti i prezanton senatit italian paketën e masave antikrizë me vlerë 33 miliardë euro e cila synon uljen e borxhit të Italisë. "Evropa, Italia, dhe realiteti i saj territorial, janë pjesë thelbësore e një zhvillimi të përbashkët, ku të gjithë janë thirrur të luajnë rolin e tyre",- u shpreh  Monti para  senatorëve. 

Vetëm një ditë më parë, Monti i tha një komisioni parlamentar për buxhetin, se reformat e reja do të përmbajnë masa më të lehta për më të varfërit dhe pensionistët. Ndryshimet në paketën e mbiquajtur "Të shpëtojmë Italinë" vijnë si kundërpërgjigje e zemërimit të sindikatave që kanë filluar një seri grevash të përgjithshme. 

Masat ekonomike të prezantuara në Senat kanë hasur dhe në kundërshtimin e përfaqësuesve të La legas,  të cilat bënë thirrje për  më pak taksa. Por sipas kryeministrit Monti, paketa e masave e diskutuar në dhomën e komunëve, i ka dhënë Italisë mundësinë të ulet në tavolinën e diskutimeve në Bruksel, me më shumë kredibilitet e i ka lejuar të mbajë një pozicion autonom për një sërë çështjesh të agjendës evropiane. 

Monti ka pranuar "sakrificat" që qeveria e tij u kishte kërkuar italianëve të bënin dhe ndikimin që taksat më të larta dhe ulja e shpenzimeve do të kenë në rritjen ekonomike, por tha se ishte një çmim që duhej të paguhej për të ulur kostot e huamarrjes së Italisë, në tregjet ndërkombëtarë.

Albanian Screen