Eliminatoret e Botërorit 2014, zbardhet kalendari i Shqipërisë

Eliminatoret për Botërorin 2014, kombëtarja e Shqipërisë do t’i startojë në fushën e vet, më 7 shtator 2012, ndaj Qipros. Ndërkohë, janë fiksuar edhe datat dhe ndeshjet e tjera, duke kompetuar kësosoji kalendarin e Grupit E eliminator për këtë kompeticion, në të cilin, përvec Shqipërisë, marrin pjesë edhe Qipro, Zvicra, Norvegjia, Sllovenia dhe Islanda. Ndeshjet kualifikuese do të fillojnë më 7 shtator të vitit të ardhshëm dhe do të mbyllen më 15 tetor 2013. Kuqezinjtë tanë e nisin në shtëpi me qipriotët dhe e mbyllin në fushën e këtyre të fundit, me shpresën se kësaj here do të bëjnë dicka më tepër, sa i takon pikëve të grumbulluara dhe pozicionimit në grup. Me Zvicrën, pjesë e së cilës janë disa kosovarë, kombëtarja shqiptare do të luajë më 11 shtator 2011 në transfertë, për të vijuar pastaj me kalendarin, sipas datave dhe ndeshjeve të përcaktuara sot mes përfaqësuesve të të gjitha federatave respektive. Për FSHF-në, në përvijimin e këtij kalendari ka qenë vetë presidenti Armando Duka, i cili shoqërohej nga dy ish-lojtarë të kombëtares, Edvin Murati dhe Alban Bushi. Që nga fillimi e deri në fund të takimit përfaqësuesit e lartë të federatave respektive nuk ranë dakord për datat, kështu qe u vu në përdorim shorti, i cili për ekipin tonë kombëtar u tërhoq nga goleadori i njohur kuqezi, Alban Bushi. Shorti përkatës prodhoi këtë kalendar:

7 shtator 2012

Shqipëri-Qipro

11 shtator 2012

Zvicër-Shqipëri

12 tetor 2012

Shqipëri- Islandë

16 tetor 2012

Shqipëri-Slloveni

22/23 mars 2013

Norvegji-Shqipëri

7/8 qershor 2013

Shqipëri-Norvegji

6 shtator 2013

Slloveni-Shqipëri

10 shtator 2013

Islandë-Shqipëri

11 tetor 2013

Shqipëri-Zvicër

15 tetor 2013

Qipro-Shqipëri