Fillimet e Reaksionit, deputeti Xhafaj flet për Populizëm Gjyqësor

Ka folur në seancën e djeshme parlamentare edhe Fatmir Xhafaj, një ndër njerëzit më aktivë në realizimin e reformës në drejtësi, ish-ministër i Brendshëm dhe I Drejtësisë dhe një njeri i koniunkturave në Partinë Socialiste. Në fjalën e tij, gjatë një seance ku raportonin përfaqësues të sistemit të drejtësisë, z. Xhafaj u shfaq gati si një lektor mbi puën e përfaqësuesve të sistemit dhe parimet e saj, duke vendosur një listë të gjatë kritikash që kapën majën me akuzën për Populizëm Gjyqësor.

Në listën e kritikës kanë kaluar dy këshillat, ai gjyqësor dhe ai i Prokurorisë, ndërkohë që z. Xhafaj ka vënë në dukje mungesën e punë kontrolluese nga një autoritet i veshur me shumë pushtet si Inspektori i Lartë i Drejtësisë.

Ajo që tërheq vëmendjen është jo kritika si e tillë, të cilën z. Xhafaj u kujdes ta ndërlidhte me gjetjet e raportit të Këshillit të Europës, por fakti se në kontesktin e saj, deputeti socialist ka akuzuar institucuionet e reja të drejtësisë për masa disproporcionale, të pabarabarta sigurie, për sjellje të diferencuar në çështje të ndryshme, duke folur drejtpërdrejt për politikë penale që rast pas rasti ndjek axhendën e portaleve mediatike.

Asgjë konkrete, asgjë e qartë për publikun, pakkush mund ta kuptojë ku e ka fjalën ky përfaqësues i zgjedhur i popullit, duke lënë në errësirë një marrëdhënie që ka nisur të kontaminohet. Ajo çfarë mund të nuhatet pa ekuivok në këtë fjalë, është fakti se veprimet e institucioneve të drejtësisë kanë shqetësuar shokët socialistë, jo thjesht për veprimin e tyre, por për jo-ortodoksinë e veprimit, çka i bën të paparashikueshme, nxit keqkuptime dhe mesa duket dëmton kohezionin politik brenda vetë PS-së. Sepse në rrjedhën e besimit se “Rama të mban”, pakkush do të kuptojë apo analizojë veprimet e dallueshme të SPAK për njërën çështje apo tjetrën.

Pakkush do të gëlltisë si të pranueshme që z. Rama të investohet për mbrojtjen e Olta Xhaçkës dhe të ngrejë akuzën kundër SPAK për bazat e Limjonit dhe Shëngjinit, ndërkohë që nuk e hap gojën për kënd tjetër. Në këto kushte leksioni i z. Xhafaj përmbledh në thelbin e vet jo thjesht një kritikë, por manifeston edhe një lloj reaksioni ndaj punës së organave të reja të drejtësisë mbi të cilat mesa duket ka humbur kontrolli.

s.zaimi