Ndahet nga jeta Ismail Kadare

Ndahet nga jeta në moshën 88-vjeçare shkrimtari Ismail Kadare. Kadare ndërroi jetë në orët e para të mëngjesit të sotëm në QSUT. Ai lë pas një krijimtari të jashtëzakonshme në prozë dhe poezi, e cila e ka bërë atë disa herë pjesë të listës së kandidatëve për Nobelin e letërsisë.

Kadare lindi më 28 janar 1936 në Gjirokastër, ku përfundoi edhe arsimin e mesëm. Ai vijoi studimet në Gjuhë dhe Letërsi në Universitetin e Tiranës. Pas përfundimit të tyre, Kadare u zhvendos në Moskë, ku për dy vjet studioi në Institutin e Letërsisë Botërore "Maksim Gorki" (1958-1960).

Kthimi në Shqipëri do t’i hapte rrugën nisjes së një krijimtarie të gjatë letrare, që do ta bënte atë shkrimtarin më të njohur shqiptar jashtë kufijve të vendit. Deri më sot veprat e tij janë përkthyer në rreth 45 gjuhë të ndryshme. Kadare është nderuar me shumë çmime ndërkombëtare, mes të cilëve Çmimin “Man Booker International” më 2005, çmimin Princi i Asturias për Artet më 2009 dhe Çmimin «Jeruzalem» më 2015. Në vitin 1996 Kadare u bë anëtar i përhershëm i Akademisë së Shkencave Morale dhe Politike në Francë dhe për shumë kohë e ndau jetën mes Parisit dhe Tiranës.