Gjermania: Izraeli po shkel ligjin ndërkombëtar  

Zëvendëskancelari gjerman, Robert Habeck, thotë se Izraeli po shkel ligjin ndërkombëtar duke vazhduar ofensivën e tij kundër Rafah. Habeck është politikani i parë gjerman i nivelit të lartë që mban publikisht një qëndrim kaq të fortë ndaj ofensivës ushtarake izraelite në Rripin e Gazës.

"Nuk duhet ta bëjë këtë," tha Habeck në një dialog me qytetarët në kryeqytetin gjerman. "Izraeli duhet t'i përmbahet ligjit ndërkombëtar," tha ai.

Vërejtjet e tij përfaqësojnë një ndryshim në retorikën e përfaqësuesve të lartë të qeverisë gjermane, të cilët më parë kanë paralajmëruar Izraelin të mos sulmojë Rafahun, por kanë hezituar të shprehen në mënyrë kaq të drejtpërdrejtë.

“Uria, vuajtjet e popullatës palestineze, sulmet në Rripin e Gazës janë – siç po shohim tani në gjykatë – të papajtueshme me ligjin ndërkombëtar”, tha Habeck.

"Me fjalë të tjera, Izraeli e ka kaluar vijën atje dhe nuk duhet ta bëjë këtë," tha Habeck, i cili mban edhe postin e ministrit të Ekonomisë.

Gjykata Ndërkombëtare e Drejtësisë, gjykata më e lartë e Kombeve të Bashkuara, kërkoi këtë javë që Izraeli duhet "të ndalojë menjëherë ofensivën e tij ushtarake" në Rafah në Rripin e Gazës. Izraeli e kundërshtoi vendimin duke intensifikuar sulmin në Rafah.