Refuzon zbatimin e vendimeve të Kushtetueses, por vetëshpallet garant i pavarësisë së SPAK-ut

Kryeministri Edi Rama ka dalë sot me një mesazh për vizitën e sekretarit amerikan të Shtetit, Anthony Blinken në Tiranë më 16 shkurt. Në mesazhin e vet, publikuar në faqen e vet në facebook, z. Rama rendit si të thuash arritjet e Shqipërisë sipas tij dhe kalon në revistë cilësitë e saj perëndimore. Ajo që tërheq vëmendjen megjithatë është ndalesa e posaçme e kryeministrit në reformën në drejtësi për të cilën përcjell një mesazh shumë ambig.

Sekretari Blinken do të gjejë një Shqipëri mirënjohëse për miqësinë e pazëvendësueshme dhe për mbështetjen pa rezerva të Shteteve të Bashkuara në rrugën e transformimit tonë rrënjësor, e posaçërisht në këtë kohë një Shqipëri falënderuese për partneritetin e çmuar të Shteteve të Bashkuara në reformimin historik të sistemit të drejtësisë, ku qeveria që unë kam privilegjin të udhëheq mbetet vendosmërisht garante e pavarësisë së drejtësisë së re, në përpjekjen e madhe për zhbërjen e kulturës së vjetër të pandëshkueshmërisë

shkruan z. Rama.

Si mundet të jetë ekzekutivi garant i pavarësisë së drejtësisë së re që u sanksionua me ndryshime kushtetuese konsensuale?

Është një mesazh që flet më shumë se të gjithë aspektet e tjera për shkak se klasa politike shqiptare është në vorbullën e një kontrolli penal thuajse tërësor që ka nxitur një frymë pasigurie. E përmbi të gjithë, përflitet emri i z. Rama si diktues i kësaj drejtësie, edhe pse ky supozim nuk gjen shumë mbështetje në realitet.

Megjithatë ky vetëreferim si shtylla e pavarësisë për drejtësinë duhet të jetë shumë problematik sa kohë që nuk ka asnjë element të mbështesë këtë pretendim, sidomos nëse mbajmë parasysh se vetëm pak ditë më parë Gjykata Kushtetuese e Shqipërisë deklaroi se vendimet e saj nuk po zbatohen nga Kuvendi i Shqipërisë duke konsumuar një shkelje shumë të rëndë.

Dhe po flasim për një vendim që ka të bëjë me mandatin e ish-ministres Xhaçka, ndaj së cilës ka vendim gjykate se ka marrë vendime që kanë cenuar sigurinë kombëtare. Si do të analizohej kjo sjellje e një Kuvendi ku dominon vetëm një njeri që sot shpallet garant?

s.zaimi