Nëse Izraeli do paqe, të mos mbjellë urrejtje

Përfaqësuesi i Lartë i BE-së për Punët e Jashtme, Josep Borrell, pranoi se është pak “pak pro-palestinez” në një intervistë për El Pais, ku ndërsa dënoi sulmin e Hamasit ndaj Izraelit, përsëriti se “një horror nuk justifikon një horror tjetër”, duke iu referuar bombardimit të pamëshirshëm të Gazës.

Kryediplomati i BE-së tha se u ka kujtuar zyrtarëve izraelitë se "lufta ka rregullat e saj" dhe për  "bombardimet duhet të merren parasysh viktimat që po shkaktojnë".

Ndërkohë, Borrell shprehu rezerva në lidhje me pretendimet izraelite se sulmet e fuqishme ndaj ndërtesave në Gaza kishin për qëllim të shkatërronin tunelet e fshehura nëntokësore të ndërtuara nga Hamasi. “E kanë apo jo këtë qëllim, unë personalisht nuk e di”, tha ai.

Borrell thekson se konflikti midis Izraelit dhe Palestinës "nuk mund të zgjidhet me eksodin masiv të më shumë se dy milionë" njerëzve nga Gaza dhe se zgjidhja e vetme do të ishte ajo politike. "Nëse Izraeli dëshiron të ndërtojë paqen, ai nuk mund të mbjellë më shumë urrejtje tani," shtoi ai, duke vënë në dukje se rezultati i konfliktit varet kryesisht nga fakti nëse të dy palët janë në gjendje të negociojnë lirimin e më shumë se 240 pengjeve të mbajtura nga Hamasi.

Që nga fillimi i armiqësive më 7 tetor, BE-ja ka pranuar të drejtën e Izraelit për vetëmbrojtje dhe ka mbështetur thirrjet për një pauzë humanitare. Megjithatë, disa vende evropiane - si dhe Shtetet e Bashkuara, të cilat janë mbështetësi kryesor i Izraelit - kanë hezituar t'i nxisin të dyja palët të bien dakord për një armëpushim, duke përmendur shqetësimet nëse një marrëveshje e tillë do të garantonte sigurinë e vendit në të ardhmen.