Nagorno-Karabaku dorëzohet plotësisht te Azerbajxhani

Republika e Nagorno-Karabakut do të pushojë së ekzistuari që nga 1 janari 2024. Presidenti i republikës së vetëshpallur, Samvel Shahramanyan, nënshkroi një dekret për shpërbërjen e të gjitha institucioneve.

“Bazuar në prioritetet e garantimit të shëndetit fizik dhe interesave të popullit të Karabakut, duke marrë parasysh gjendjen e arritur përmes komandës së kontingjentit paqeruajtës rus me përfaqësuesit e Azerbajxhanit për kalimin e lirë, vullnetar dhe të papenguar të banorëve të Nagorno-Karabakh, duke përfshirë personelin ushtarak që kanë dorëzuar armët... u mor një vendim që të gjitha innstitucionet shtetërore dhe organizatat nën juridiksionin e tyre të shpërbëhen deri më 1 janar 2024 dhe Republika e Nagorno-Karabakut të pushojë së ekzistuari », thuhet ne dekret.

Javën e kaluar, Baku njoftoi nisjen e "aktiviteteve lokale anti-terroriste" në rajonin e shkëputur të Nagorno-Karabakut me qëllimin "rivendosjen e kushteve", dhe Jerevani e cilësoi këtë aksion si agresion kundër popullsisë së Nagorno-Karabakut.

Një ditë pas kësaj, Azerbajxhani dhe përfaqësuesit e armenëve nga Nagorno-Karabakh ranë dakord për një ndërprerje të plotë të armiqësive me ndërmjetësimin e paqeruajtësve rusë.

Deri më sot, më shumë se 65 000 njerëz janë të larguar nga Nagorno-Karabakh në Armeni, më shumë se gjysma e popullsisë së enklavës tashmë nën qeverisjen e Azerbajxhanit.

“Shteti ofron shërbime për të gjithë ata që nuk kanë ku të qëndrojnë”, tha qeveria në një deklaratë, cituar nga BBC. Baku ka hapur Korridorin Lachin, e vetmja rrugë që lidh enklavën me Armeninë.

Zyrtarët e Bakusë njoftuan se banorët janë të sigurt, por kryeministri armen Nikol Pashinyan tha se armenët nga Karabaku janë në rrezik të spastrimit etnik.