Bëjeni ministre këtë!

Skandali i Ilir Metës spiun i Sigurimit zgjati më pak nga sa pritej. Filip Talo, personi që thuhet se vuri në lëvizje këtë furtunë në gotë, u shpreh se atë nuk e kishte spiunuar ish-presidenti.

Skandali në fakt është te protagonizmi publik i Autoritetit të Dosjes që ka publikuar vendime me të dhëna personale, ndërkohë që për aq sa i takon, Autoritetit do t’i mjaftonte përcjellja shkresore në Kuvendin e Shqipërisë, bashkë me propozimet për amendim ligjor. Është e vështirë të mendosh se Gentiana Sula nuk ka qenë e vetëdijshme për atë që po bënte dhe që e verbuar nga dashuria për drejtësinë dhe pastrimin e shoqërisë shqiptare, rendi të postonte edhe në Facebook një vendim që turbullon politikën.

Aq më tepër kur ajo detyrimin për të informuar e ka ezauruar. Jemi përpara një rasti tipik të shërbimit politik nga një titullar institucioni që e hapi njoftimin e vet për politikanin I.M – pra duke cilësuar që është politikan, me pretendimin se është i pavarur. T’i lëmë shtirjet se demokracia në Shqipëri është asgjë më shumë se një pëvjetor imagjinar e të pranojmë se me këtë që bëri dhe ashtu si e bëri, zoznja. Sula duhet bërë ministre. Pse jo zv.kryeministre. i plotëson të gjitha kërkesat dhe standardet e kësaj qeverie.