"43.4 miliardë dollarë kesh për ta bërë Twitterin platformë të fjalës së lirë"

Ambicia e Elon Musk për të pasur në dorë Twitter nuk ndalet. Miliarderi është i gatshëm të paguajë 54.20 dollarë për aksion për të blerë 100% të kompanisë. Oferta është me para në dorë dhe e vlerëson kompaninë plot 43.4 miliardë dollarë.

"Kam investuar në Twitter pasi besoj në potencialin e tij për të qenë platforma e fjalës së lirë në mbarë globin dhe besoj se liria e fjalës është një imperativ shoqëror për një demokraci funksionale," shkroi Elon Musk në një email strukturës drejtuese të Twitter.

Megjithatë, që kur kam bërë investimin tim, tani e kuptoj se kompania as nuk do të lulëzojë dhe as nuk do t'i shërbejë këtij imperativi shoqëror në formën e tij aktuale. Twitter duhet të transformohet si një kompani private.

“Si rezultat, unë ofrohem të blej 100% të Twitter-it për 54,20 dollarë për aksion në para kesh. Oferta është oferta ime më e mirë dhe përfundimtare dhe nëse nuk pranohet, do të më duhej të rishqyrtoja pozicionin tim si aksioner”, shtoi ai.

Aksionet e Twitter-it aktualisht tregtohen me 50,97 dollarë për aksion, një rritje prej 11,97% krahasuar me vetëm një ditë para kësaj deklarate.

Më 4 prill, Twitter konfirmoi se Musk kishte marrë një pjesë të konsiderueshme në rrjetin social. Duke blerë 9.2% të aksioneve të kompanisë, Musk u bë aksioneri më i madh i Twitter.

Të nesërmen, Twitter njoftoi se pronari i Tesla dhe SpaceX do t'i bashkohej bordit të drejtorëve. Si anëtar i tij, Musk nuk do të lejohej të zotëronte më shumë se 14.9% të kompanisë.

Por CEO i Twitter, Parag Agrawal më vonë njoftoi një ndryshim të madh. Musk i tha kompanisë se ai nuk do t'i bashkohej bordit. Që atëherë, ka pasur shumë spekulime për lëvizjen e radhës të Musk.

Shumë parashikuan se miliarderi do të fillonte një kontroll armiqësor pasi të hiqte dorë nga vendi i bordit. Musk aktualisht është njeriu më i pasur në botë. Sipas Forbes, ai vlen 273.6 miliardë dollarë.