"Lufta" për të dhënat e Europës, Austria: Google Analytics shkel GDPR

Grumbullimi dhe ruajtja e të dhënave vijon të mbetet shkak për përplasje mes Europës dhe amerikaneve Big Tech. Rasti i fundit është ai i Austrisë, e cila e ka gjetur Google Analytics në shkelje të rregullores europiane GDPR.

Autoriteti Austriak për Mbrojtjen e të Dhënave konkludoi se përdorimi i Google Analytics shkel Rregulloren e Përgjithshme të Mbrojtjes së të Dhënave (GDPR), raporton Euractive. Austria i fton shtetet e tjera anëtare të BE-së mund të ndjekin shembullin e saj, pasi rregullatorët bashkëpunojnë në një grup pune në Bordin Evropian të Mbrojtjes së të Dhënave.

Vendimi bazohet në disa ankesa që OJQ-ja austriake noyb paraqiti pas vendimit të Gjykatës Evropiane të Drejtësisë 'Schrems II'. GJED-ja vendosi që marrëveshja e transferimit të të dhënave SHBA-BE "Mburoja e privatësisë" nuk është në përputhje me ligjin e BE-së për mbrojtjen e të dhënave dhe e rrëzoi marrëveshjen në vitin 2020, e cila i bëri shumicën e transferimeve të të dhënave në SHBA të paligjshme.

Megjithatë, vendimi është injoruar pjesërisht nga Google. Gjatë procedurave, gjiganti i teknologjisë pranoi se "të gjitha të dhënat e mbledhura përmes Google Analytics ruhen dhe përpunohen në SHBA", ku përfshihen përdoruesit evropianë.

Meqenëse shumë kompani të BE-së përdorin Google Analytics, shumë prej tyre i kanë përcjellë të dhënat e tyre Google, duke lejuar që ato të përpunohen në SHBA.

Autoriteti Austriak për Mbrojtjen e të Dhënave ka vendosur tani se kjo sjellje përbën një shkelje të ligjit të BE-së.

Vendimi i autoriteteve austriake është vetëm i pari nga 101 ankesat që noyb ka paraqitur pothuajse në të gjitha vendet e BE-së.

Të martën, Mbikëqyrësi Evropian i Mbrojtjes së të Dhënave mori një vendim të ngjashëm, sipas të cilit përdorimi i Google Analytics nga Parlamenti Evropian shkel GDPR.