Tërmeti i lirës trondit ekonominë turke, Erdoganit i kthehen kundër bizneset e mëdha

Lira turke vijon rënien e lirë. Kjo e fundit u thellua akoma më shumë sot, pasi Presidenti Rexhep Tajip Erdogan përmendi fenë myslimane si shkak për mosngritjen e normave të interesit për të stabilizuar monedhën.

Erdogan e ka shtyrë bankën qendrore të ulë ndjeshëm kostot e huamarrjes pavarësisht se norma vjetore e inflacionit është rritur në më shumë se 20 për qind.

Ekonomistët besojnë se kjo politikë mund të çojë në rritjen e çmimeve të konsumit me 30 përqind ose më shumë në muajt e ardhshëm.

"Ata ankohen se ne vazhdojmë të ulim normën e interesit. Mos prisni asgjë tjetër nga unë. Si mysliman, unë do të vazhdoj të bëj atë që na thotë feja jonë. Ky është urdhri."

Feja islame i ndalon myslimanët të marrin ose të paguajnë interes për paratë e marra hua.

Normat e larta të normës së interesit ngadalësojnë rritjen ekonomike.

Por bankat qendrore i rrisin këto norma kur inflacioni del jashtë kontrollit.

Lira turke tashmë ka humbur gati gjysmën e vlerës së saj vetëm në tre muajt e fundit.

Më 1 janar të këtij viti, një dollar këmbehej me 7.4 lira. Sot, sipas France 24, një dollar u këmbye me 17.5 lira.

Banka qendrore e Turqisë e ka ulur katër herë normën e interesit, në 14 për qind nga 19 për qind.

Diplomatët mendojnë se Erdogan shpreson te rritja ekonomike me çdo kusht si një mënyrë për të zgjatur sundimin e tij në një dekadë të tretë në zgjedhjet që do të priten deri në mesin e vitit 2023.

Erdogan muajin e kaluar nisi një "luftë ekonomike të pavarësisë" të vetëshpallur që synon të thyejë varësinë e Turqisë nga investimet e huaja dhe koston e luhatshme të importeve si nafta dhe gazi natyror.

Por kjo strategji po përballet me rezistencë në rritje nga liderët e fuqishëm të biznesit, të cilët ishin mbledhur rreth Erdoganit përgjatë 19 viteve të qeverisjes së tij.

Lobi i biznesit të madh TUSIAD e kritikoi ashpër presidentin gjatë fundjavës.

"Zgjedhjet e politikave të zbatuara këtu nuk po krijojnë vetëm probleme të reja ekonomike për bizneset, por për të gjithë qytetarët tanë," tha lobi i biznesit të madh.

“Është urgjente që të vlerësojmë dëmin që i është bërë ekonomisë dhe të kthehemi shpejt në zbatimin e parimeve të vendosura ekonomike, në kuadrin e një ekonomie të tregut të lirë".

Ndërsa Erdogan u kundërpërgjigj: “Puna që duhet të bëni ju është të siguroni investime, prodhim, punësim dhe rritje. Kaq!”