“Turqia po i largohet vetë rrugës europiane”

Kreu i grupit parlamentar të PPE, Manfred Weber, thotë se BE u shfaq e ndarë dhe e dobët gjatë vizitës së dy presidentëve të saj në Ankara. Lidhur me marrëdhëniet e kësaj të fundit me BE-në, Weber thotë se ajo "po largohet" nga vlerat evropiane dhe se nuk ka arsye që për momentin të nisë një axhendë pozitive. Kreu i eurodeputetëve të djathtë në PE i bëri këto komente në një intervistë me greken "Kathimerini". 

A duhej të ishte bërë vizita e dy presidentëve në Ankara? A janë përmbushur kushtet për një axhendë pozitive me Turqinë?

Udhëtimi kishte për qëllim t'i dërgonte një sinjal force Ankarasë pas përfundimeve të Këshillit Evropian, në mars. Por në vend që të bënte këtë, mesazhi që përcolli ishte ai i ndarjes, paaftësisë për të qëndruar në skenën globale. Dhe ishte veçanërisht negative që Ursula von der Leyen u trajtua në atë mënyrë siç ishte pasi Turqia u tërhoq nga Konventa e Stambollit. Ne jemi larg premtimit për një "Evropë gjeopolitike". Kërkesa jonë për Këshillin dhe Komisionin është të koordinohemi në të ardhmen, në mënyrë që kjo të mos ndodhë më kurrë.

A kuptohet më mirë në Evropë sot, krahasuar me fillimin e vitit 2020, hendeku i vlerave që e ndan atë nga Turqia dhe për drejtimet e ndryshme të të dy palëve në politikën e jashtme?

Është e qartë se Turqia po largohet nga Evropa dhe vlerat e saj - sundimi i ligjit, liria e medias, pavarësia e gjyqësorit. Kryeministri i Italisë ishte më i hapur për këtë, por të gjithë e pranojnë një gjë të tillë. Kjo është përmbajtja - dhe kjo është arsyeja pse, për mua, është e qartë që ne nuk mund të hapim një kapitull të ri me Turqinë, nuk mund të flasim për liberalizim vizash ose modernizim të Bashkimit Doganor. Hapi i parë është rivendosja e besimit, për të parë fundin e provokimeve. Javët e ardhshme do të sqarohet nëse ka kuptim të vazhdohet me bisedime të tilla [në lidhje me axhendën pozitive].

Lidhur me Certifikatën e Gjelbër Dixhitale, cilat janë mosmarrëveshjet kryesore midis Parlamentit Evropian dhe Këshillit?

Gjëja më e rëndësishme është që ne duhet ta çojmë deri në fund. Ne tashmë kemi humbur kaq shumë kohë të vlefshme - Kryeministri grek e ka hedhur këtë ide në janar dhe Komisionit iu desh shumë kohë për të paraqitur propozimin e tij. Ideja është të shmangim copëzimin në Bashkimin Evropian.

Për ne është e qartë se duhet të forcojmë rregulloret - dhe kjo do të thotë që ne duhet të pranojmë vetëm vaksina të miratuara nga EMA për certifikatën. Sputnik V nuk është aprovuar nga EMA - të paktën jo akoma - kështu që nuk mund të njihet si mburojë e vërtetë kundër pandemisë. Së dyti, është e rëndësishme që kur evropianët pyesin se çfarë efekti do të ketë certifikata në jetën e tyre të përditshme, t'u japim një përgjigje. Kjo është arsyeja pse ne insistojmë që certifikata të rikthejë lirinë e lëvizjes në BE. Të drejtat duhet të rikthehen plotësisht kur arsyet e kufizimit të tyre nuk ekzistojnë më. Shpresojmë që Këshilli të dorëzojë këto dy pika dhe ne mund të votojmë për formën përfundimtare të certifikatës në seancën plenare të majit.

Po në lidhje me udhëtimet nga vendet e treta - një front në të cilin Greqia ka bërë disa lëvizje të njëanshme? A do të ketë një qasje të koordinuar? Dhe a do të bëhet në kohë?

Aktualisht po kalojmë nga një qasje e bazuar në rajone dhe pasqyrën epidemiologjike, në një qasje të personalizuar, të ngjashme me atë që është duke u miratuar brenda BE-së. Sidoqoftë është thelbësore të kemi reciprocitet - për shembull nëse vendoset që amerikanët që janë vaksinuar të mund të udhëtojnë në Evropë, evropianët e vaksinuar gjithashtu duhet të jenë në gjendje të vizitojnë SHBA-të.

Cili ishte gabimi më i madh që BE bëri në prokurimin e vaksinave? A e shihni narrativën që ndryshon ndërsa fushata e vaksinimit rritet?

Evropa bëri gabime dhe ne duhet ta pranojmë këtë. Ndoshta më i madhi ishte se ne ishim disi naivë në besimin tonë në marrëveshjet e nënshkruara dhe në qasjen e bazuar në rregulla të vendeve të botës perëndimore. SHBA dhe Britania nuk ndoqën qasjen e zinxhirëve ndërkombëtarë të furnizimit dhe tregjeve të hapura. Ato vepruan nacionalistisht, në mënyrë egoiste, ndërsa Evropa vazhdoi të eksportonte. Historia e suksesit të vaksinave të Britanisë nuk do të ishte e mundur pa dërgesat nga Evropa.

Por ne i nxorëm mësimet tona. Ne kemi vendosur parimin e reciprocitetit - ne nuk dorëzojmë në Britani nëse ata nuk na dorëzojnë ne. Ne kemi përgatitur terrenin për një rritje të madhe të prodhimit në vjeshtë, kur mund të shfaqen variante të reja të virusit. Kontrata e re me Pfizer dhe BioNTech është një zhvillim shumë pozitiv. Në të njëjtën kohë, është e rëndësishme që tani të kemi mjetet për të bllokuar eksportet e vaksinave nëse kompania eksportuese ose vendi i destinacionit nuk sillen si duhet në raport me Evropën.