Shfaqen ndërkombëtarët, jo sipas variantit të Fatmir Xhafës

Fatmir Xhafa tha sot se ndërkombëtarët kanë kërkuar futjen me procedurë të përshpejtuar të Ligjit të Vettingut ose siç njihet ndryshe Ligji për Vlerësimin e Gjyqtarëve dhe Prokurorëve, duke kërkuar që ligji madje të miratohej këtë të enjte, ndonëse procedura e kërkonte që miratimi i 7 ligjeve shoqëruese të paketës të reformës në drejtësi të bëhej 15 ditë pas dekretit të presidentit.

Në fakt nuk u kuptua mirë nëse Fatmir Xhafa foli si socialist apo si zëdhënës i ndërkombëtarëve, të cilët nga ana e tyre dolën me një deklaratë ku sqaruan se miratimi i Ligjit të Vetingut mund të bëhet vetëm pas hyrjes në fuqi të ndryshimeve kushtetuese.

Më poshtë deklarata e BE-së:

BE së bashku me SHBA-të kanë kërkuar miratimin e shpejtë të shtatë ligjeve, dhe të parin ligjit e vlerësimit (vetting), në mënyrë që të përshpejtohet zbatimi i paketës së Reformës në Drejtësi.

Kjo gjë i është bërë e ditur të gjithë udhëheqësve politikë, dhe Kryetari i Kuvendit Meta ka konfirmuar se si Kryetar i Kuvendit është i gatshëm të thërrasë mbledhjen e një seance të jashtëzakonshme të Kuvendit me të hyrë në fuqi Ndryshimet Kushtetuese (më 11 gusht), meqenëse krerët e grupeve parlamentare kanë rënë dakord për këtë.

Miratimi i shpejtë i ligjeve zbatuese është parakusht për nisjen e zbatimit të Reformës në Drejtësi, dhe i një rëndësie themelore për rrugën evropiane të Shqipërisë.

Drafti u është shpërndarë të gjithë anëtarëve të Komisionit të Posaçëm për Reformën në Drejtësi gjysmën e dytë të muajit qershor.