Zëra për grusht shteti në Turqi. Kryeministri Yildirim mohon: Ishte një aksion i paautorizuar nga një grup ushtarak. Qeveria mbetet në detyrë

Një situatë krejt e pazakontë ka ndodhur sot në Ankara të Turqisë. Mediat raportuan të shtëna armësh dhe lëvizje tankesh në rrugë. Po kështu trafiku i makinave u bllokua në urën e Bosforit dhe atë Sulltan Mehmet Fatihu në Stamboll. BBC-ja citon kryeministrin turk, Binali Yildirim, sipas të cilit “një grup ushtarak ka kryer një aksion të paautorizuar”. Yildirim ka mohuar zërat për një grusht shteti dhe ka shtuar se “qeveria është ende në detyrë”. Nuk dihet mirë sesi qëndron puna, por në kryeqytetin turk janë parë të fluturojnë edhe avionë ushtarakë.