Ish-ministrja e Kulturës në Francë vijon të tallet, kësaj radhe me të gjithë shqiptarët: “Kur thashë zgjedhje shqiptare iu referova kohës së Enver Hoxhës”

A duhet një konfirmim apo dëshmi e “Bashkimit Europian” për të kuptuar se çfarë turpi ishte referendumi, i ashtuquajtur i tillë, në Partinë Socialiste? Natyrisht që jo. Për këtë mjafton vetëm arsyeja më normale. Referendumi ngeci në trajtimin mediatik si një lloj keqkuptimi, fshehur mbas një pyetjeje të padenjë për të thirrur në votim anëtarësinë dhe po vazhdon të prodhojë keqkuptime. Sot u raportua se ai ka shërbyer si një standard në talljen që na vjen pa doganë nga “Bota e qytetëruar”. U tha se ish-ministrja e kulturës e Francës Aureli Filipeti, aktualisht deputete e krahinës së Mozeles, kishte deklaruar se “e majta franceze nuk duhet të bëjë zgjedhje sipas modelit shqiptar”.

Po ku e ka patur vallë fjalën ish-ministrja franceze? Sipas “Vizion Plus” që e kontaktoi, ish-ministrja e paska patur fjalën për periudhën e Enver Hoxhës në Shqipëri. “I dashur zotëri më vjen keq për këtë keqkuptim, por kur në politikën franceze përdorim shprehjen zgjedhje shqiptare, me këtë kemi parasysh periudhën e diktaturës, kohën kur kishte vetëm një parti dhe kandidati i saj merrte 99 % te votave. Nuk kisha parasysh Partinë Socialiste të Shqipërisë dhe më vjen shumë keq që kjo gjë është keqinterpretuar”, deklaron ish-ministrja franceze(http://vizionplus.al/deputetja-franceze-flet-per-vizion-plus/).

VP shton se: “E majta franceze është në prag të zgjedhjeve dhe në qëndrimin e saj të publikuar nga gazeta “Le Parisien”, zonja Filipeti shprehej se socialistët që mbështesin Fransua Hollonde kërkojnë që ai të rilegjitimohet dhe të forcojë më tej pozitat, duke mos pranuar garën reale. Partia e socialistëve francezë e ka shtyrë për në muajin qershor marrjen e vendimit, nëse do të ketë një apo disa kandidatë në zgjedhje për kreun e saj”.

Pra në Shqipëri qenkan keqkuptuar me ish-ministren, e cila ka lindur në vitin 1973, pra ka qenë 17 vjeç kur në Europën Lindore nisën ndryshimet. Ngjan diçka e pazakontë që referenca për zgjedhjet të jetë për periudhën e Enver Hoxhës, i cili kishte si specifikë se nuk konkurohej fare. Por nga një ministre Kulture e Francës me siguri që nuk ka vend befasia në çështje të historisë, pasi kjo e fundit është i vetmi tregues kulture së fundmi.
Ajo që të lë pak skeptik është edhe fakti nëse regjimi i Enver Hoxhës njihet edhe për mungesën e zgjedhjeve përveçse të zezave të tjera që i janë njohur me kohë! Ndoshta është edhe kjo e vërtetë, ndërkohë që ky zakoni i “keqkuptimit” është një zakon krejt i ngjashëm me atë që e majta zyrtare shqiptare përdor rëndom si argument në raport me mediat.