Ekspertët kontabël zbardhin shumën e përfituar nga vjedhja me ilaçet. Për periudhën Janar 2013- Tetor 2015 dëmi arrin në 2.2 milionë euro

Prokuroria e Tiranës ka marrë në dorëzim raportin e ekspertëve kontabël në kuadër të procedimit penal të njohur tashmë si “Farmacitë 2”, në bazë të të cilit është arritur në konkluzionin se nga skema e dyshuar mashtruese, me subjekt qëndror “Omega Pharma” dhe bashkëpunues drejtuesit e disa farmacive në Tiranë, vlera e dëmit ekonomik ndaj shtetit per periudhën Janar 2013- Tetor 2015 arrin në vlerën e rreth 2.2 milionë euro.

Kjo shifër është për skemën e dyshuar mashtruese vetëm për dy lloje ilaçesh (insulinë dhe ketosteril), pasi në hetim është edhe përfshirja në rimbursim në mënyrë të paligjshme e disa llojeve të tjera barnash. Sipas hetimit të deritanishëm, rezulton se “Omega Pharma” ka shpërndarë receta të fallsifikuara tek farmaci të ndryshme dhe këto të fundit i kanë paraqitur recetat për rimbursim tek Fondi Rajonal i Kujdesit Shëndetësor Tiranë, duke tërhequr në total shumën e sipërcituar për dy llojet e ilaçeve.

Në vijim të hetimit pritet të saktësohet se si kjo shumë e përfituar në mënyrë të paligjshme (2.2 milionë euro) është ndarë ndërmjet “Omega Pharma” dhe farmacive të përfshira në këtë procedim penal.