Kur Tirana zyrtare jep leksione për Europën

Tashmë është e njohur: edhe nga Tirana zyrtare ka disa “teza” ideologjike për Europën. Më saktë leksione, në formë kritikash për sjelljen e saj, reduktimin e projektit europian(nëse ka qenë ndonjëherë ndryshe) në një klub të mbyllur që po ravijëzon kufij të ngushtë sërish në Adriatik. Prodhues i këtyre “tezave” është kryeministri Edi Rama, i cili përsërit shpesh se Europa e sotme vuan nga mungesa e një strategjie. Dhe e ka rithënë në një intervistë për gazetën italiane “Il Mattino” sot: “Evropa ka humbur në egoizëm dhe sot BE-ja është më shumë taktike dhe më pak strategjike. Do të thoja se ka një mungesë në rritje të gatishmërisë për të respektuar vlerat autentike. Më pak strategjike dhe më shumë taktike, viktimë e vetë-interesit për shkak të llogaritjeve të brendshme të kombeve të veçanta”, shprehet Rama. Kritikë që adresohet jashtë, por reflekton një dimension të thellë krize identiteti apo edhe politike brenda Shqipërisë. Politika ka dështuar që të përmbushë kërkesat e BE-së për anëtarësim, e teksa sot jepen leksione për strategjinë, një ditë më parë, i njëjti njeri pranoi dështimim e plotë në një fushë ku Europa ka 20 vite që kërkon standarde: në drejtësi. Ky dështim spektakolar në aftësinë për të bërë shtet, po synohet të vihet në emërues të përbashkët me krizën europiane, që ka sjellë si pasojë frenimim e zgjerimit. Por pak kujtesë na bën mirë, sepse kuptojmë se nuk është vetëm kështu. Shqipëria do të kishte hyrë shumë shpejt në BE, ndoshta para Samitit të Selanikut të vitit 2003, kur edhe u vunë kriteret. Por kriza e 1997-ës dhe më tej, pas Selanikut, korrupsioni konsensual i dy partive, e kanë mbajtur Shqipërinë jashtë Europës. Qeveria aktuale ka një mandat të fortë nga populli, gëzon imazh jo të keq në Perëndim. E megjithatë qasja e saj ndaj problemeve të vendit nuk është strategjike, as taktike. Më keq: kjo qeveri improvizon, aq sa ka kthyer vendimmarrjen në rezultat aksioni. Pyetja që mund të shtrohet është shumë e thjeshtë: si ka mundësi që politika shqiptare nuk gjen dot konsensus për objektivat kryesore si reforma në drejtësi dhe integrimi? “Korrupsioni është i përhapur në të gjitha degët e qeverisjes” thuhet në raportin e fundit të DASH. Sikur këtë të ketë parasysh qeveria, punët do të lëviznin diçka nga vendi e do të hiqte dorë nga leksioni për Europën, që në fund të fundit, parë nga derexheja ku e kanë katandisur Shqipërinë, reduktohet në demagogji dhe alibi për çdo eventualitet.