PS, grup pune për ndryshime statutore, sa për t’i mbyllur gojën Blushit

Shqiptarja.com njofton se Partia Socialiste ka ngritur përmes Asamblesë një grup pune i cili do të punojë për ndryshimet statutore. Një nga pikat e rëndësishme ku pritet të ndërhyhet, është ajo e konfirmimit që nëse kreu i partisë fiton zgjedhjet parlamentare, ai nuk ka nevojë t’u nënshtrohet zgjedhjeve brenda partisë për të rikonfirmuar mandatin e drejtuesit. Kjo është në fakt diçka që kryetari Rama është duke konsumuar ndërkaq, në shkelje të statutit aktual. Deputeti Ben Blushi e ka kërkuar disa herë publikisht konfirmimin e mandatit drejtues të Ramës, duke marrë përgjigje pikërisht arsyetimin e mësipërm. Dhe për “tja mbyllur gojën” Blushit, duket se është angazhuar një grup i madh. Grupi i punës së ndryshimeve statutore i cili drejtohet nga Fatmir Xhafaj, përbëhet nga Armando Subashi, Bashkim Fino, Damian Gjiknuri, Ermonela Felaj, Ethem Ruka, Majlinda Bufi, Musa Ulqini, Namik Dokle dhe Vasilika Hysi.