Zbardhet telefonata me tone të larta Rama-Tsipras. Në prapavijë ka patur përplasje diplomatike mes Italisë, Austrisë e Greqisë për Shqipërinë

Kur kanë kaluar më shumë se dy javë nga telefonata mes kryeministrit Rama dhe homologut të tij grek Aleksis Tsipras, gazeta "Kathimerini" ka zbardhur përmbajtjen dhe klimën e acaruar të bisedës mes tyre. Sipas saj, mesdita e 22 Nëntorit ka qenë jo pak nervoze për kryeministrin grek pas telefonatës me homologun shqiptar. Burime të besueshme qeveritare i thanë gazetës se Edi Rama i është drejtuar me tone të larta dhe agresive kryeministrit grek, Aleksis Tsipras, duke i kërkuar sqarime për ndalimin e dy punonjësve të Ministrisë së Jashtme shqiptare, të cilët u kapën më 14 nëntor në Kakavijë duke transportuar libra shkollorë, e që sipas Gjykatës Greke të Janinës kishin përmbajte propagandistike.

"Kathimerini" thotë se Tsipras nuk u befasua nga tonet e larta të zotit Rama dhe reagoi ashpër, duke i thënë kryeministrit shqiptar se është e paimagjinueshme që diplomatët, të cilët padyshim kishin mandatin politik për të minuar marrëdhëniet mes dy vendeve, të transportojnë libra për nxënësit, me synim konvertimin e pikëpamjeve drejt mendësive irredentiste.

Siç thotë "Kathimerini" telefonata ka patur një prapavijë të fortë diplomatike në Bruksel para shpalljes së raportit vjetor të Komisionit Europian për Shqipërinë, që ka rekomanduar hapjen e negociatave për anëtarësim. Sipas "Kathimerini" Greqia u gjend para rezistencës së fortë të Italisë dhe Austrisë, për të mos përfshirë në raport-progresin e Shqipërisë çështje që lidhen me minoritetin grek. Më tej gazeta shkrua se në këtë situatë kryeministri Tsipras ka planifikuar në fillim të Janarit një vizitë në Beograd për të forcuar aleancat në rajon, pasi edhe Serbia po përballet me probleme me nacionalizmin shqiptar.

http://www.kathimerini.gr/886459/article/epikairothta/politikh/pollaples...