Shembet me tritol 5-katëshi tek Ekonomiku

Inspektorati Kombëtar i Mbrojtjes së Territorit shembi mesditën e së dielës një objekt 5-katësh në afërsi të ndërtesës së Fakulteti Ekonomik.

Shpërthimi u realizua në mënyrë të kontrolluar dhe për të ishin marrë të gjitha masat, duke mos shkaktuar asnjë dëm dytësor.

Për të kryer këtë shpërthim, specialistët xhenierë të IKMT-së, hapën brenda objektit 300 vrima ku u vendosën lëndë shpërthyese në sasi të vogla dhe të barabarta, për shkak te afërsisë me Fakultetin Ekonomik. Shpërthimi u krye me sukses nga specialistet e IKMT-së në bashkëpunim me forcat e Policisë.

Objekti i shkatërruar kishte të paktën 6 vjet që ishte kthyer në një shkak për protesta të vazhdueshme nga ana e nxënësve të Fakultetit Ekonomik dhe administratës së saj, që më herët kanë kërkuar prishjen për shkak të pengimit të zhvillimit normal te mësimit.

Pas kryerjes së procedurave IKMT bëri të mundur shembjen e objektit, duke marrë përsipër edhe pastrimin e vendit me mjetet e saj. Hapësira do t’i rikthehet Fakultetit ekonomik.

/ Top Channel