Ministrit të Brendshëm nuk do t’i ndahet kurrë vula e ‘Antenës brenda familjes’

Rubrika ‘Antena brenda familjes’ e Temës, një shpikje e Mero Bazes, është me sa duket pak më tepër se satirike. Përqeshja që ai i ka bërë gjatë gjithë kohës Flamur Nokës, për të cilin fillimisht mendohej se ish personazh i stisur, është finalizuar me një impakt të beftë e të çuditshëm. Berisha e ka marrë gjithë këtë sulm që i bëhet nga armiqtë e tij Flamurit si një meritë të këtij të fundit; në mos si një meritë, të paktën si një arsye për ta shpërblyer si viktimë. Dhe e ka shpërblyer duke e bërë ministër të brendshëm.

Por loja e Bazes ka ngjitur dhe në opinion. Për shkak të kësaj loje, imazhi i Flamurit në kokën e gjithsecilit është ai i një njeriu të thjeshtë, shumë të thjeshtë, tmerrësisht të thjeshtë. Mark Marku thosh dje, me ironi, se "Flamur Nokën nuk e sheh dot në një optikë të së ardhshmes në PD". Dhe sot ishte Edi Rama, që "kish rënë në kurthin e kësaj klisheje”. “Ministri i ri është shembëlltyra e mediokritetit dhe e vulgaritetit” është shprehur Rama në programin e Aleksandër Furxhiut me titull ‘Prizëm’.

Në fakt, F. Noka nuk para është dëgjuar të flasë në publik (dy ditët e fundit janë shfaqur për herë të parë tre a katër foto të tijat në Google). Në këtë kuptim, mbetet akoma një personazh gjysmë misterioz.

Re.Pu.