"Tash e tutje turistët do të jenë mëse të sigurtë"

U desh vrasja makabre e dy turistëve çekë që Drejtori i Përgjithshëm i Policisë së Shtetit, Haki Çako të japë garanci se "tash e tutje ngjarje të tilla nuk do të ndodhin" dhe se turistët e huaj që vizitojnë zonat Shqipërinë do të jenë më shumë se të sigurtë. Një premtim që shikon nga e ardhmja po që nuk kuptohet pse nuk ishte i vlefshëm edhe dje, pardje, javën e kaluar apo vitin që lamë pas. Fatkeqësisht nevojën për të qenë vigjilente dhe më e angazhuar për sigurinë publike në zonat me rrrezikshmëri për të huajt, policia e kupton pasi janë "palosur" dy turistë me plumb pas koke. "Dua të siguroj shtetasit shqiptarë dhe turistëte huaj që bëhen pjesë e guidave se tash e tutje do të jenë mëse të sigurtë". Ky lloj ndërgjegjësimi që i ngjan edhe një autokritike për mungesën e vëmendjes ndaj atyre që e duan Shqipërinë dhe që e vizitojnë pavarësisht riskut që ka, është model që buron nga sensibilizimi i politikës për të trajtuar ngjarje ku ajo ka përgjegjësi. Është i njëjti premtim sa herë ndodhin përmbytje; që ato tash e tutje nuk do të ndodhin, sa herë ka aksidente tragjike ku shtetarët ekranizohen me të njëjtën thënie: tash e tutje nuk do të ndodhin. Po kush mban përgjegjësi mor vëlla për Dje, meqë po mburren vetë për sigurinë e nesërme?
l.m