Tabela e Tahirit dhe Argita 1 miliardëshe

Deputeti i Partisë Socialiste Sajmir Tahiri është duke mbrojtur veten në një proces gjyqësor të nisur me padi të fëmijëve të kryeministrit Sali Berisha. Sot paradite u zhvillua një tjetër seancë. Për ata që nuk e dinë, kjo histori nisi nga një deklaratë e Tahirit në një emision televiziv tetorin e vitit të kaluar: “Sali Berisha është i korruptuar, i biri dhe e bija janë të përfshirë në korrupson”. 

“Deklarata të tilla përbëjnë shpifje publike dhe fyerje për paditësit duke i cenuar ata në nderin, personalitetin dhe emrin e mire (reputacionin) që gëzojnë”,- thuhet në padinë për shpifje të fëmijëve të kryeministrit, Argita e Shkëlzen. Dhe kërkojnë dëmshpërblim prej 8 milionë lekësh (4 milion të reja për secilin). Deputeti i majtë është sfiduar kësisoj të provojë atë që ka deklaruar. Dhe mes të tjerash, në përpjekjet e këtyre ditëve për mbrojtje, ai ka përgatitur edhe një tabelë përmbledhëse të deklaratave të pasurisë së Argita Malltezi Berishës.

Në këtë tabelë (në foto) deputeti ka renditur e krahasuar deklarimet e vetë znj.Malltezi-Berisha për pasurinë e saj nga viti 2005 në vitin 2011. Nëse referimet e Tahirit janë të sakta, del se Malltezi-Berisha ka deklaruar 85 milionë e 600 mijë lekë pasuri në 2005 dhe 182 milionë e 567 mijë e 910 lekë pasuri në 2011. Pra ka fituar këto 6 vite, 96 milionë e 967 mijë  e 910 lekë të reja; shkurt, rreth 1 miliard lekë të vjetra.

"Në vitin 2005, kur i ati mori pushtetin, 850 milionët, znj.Malltezi i justifikoi me punën në Kosovë; pasurinë pas këtij viti, deri në 2011, i justifikon me punën si avokate në Tiranë" – përmbledh Tahiri në tabelën që e ka paraqitur në një bashkëbisedim me anëtarët e një blogu online. Booh... 1 miliard në 6 vjet si avokate... Ndoshta Tahiri do bënte mirë të merrte një tufë avokatësh dëshmitarë në gjyq. Nëse të gjithë fitojnë kaq shumë në 6 vjet, ky po që qenka profesion! (A.N.)