"Më 26 korrik do shkonim në zgjedhje" dhe disa “përgjigje futbollistike” të Metës

“Më 26 korrik do shkonim në zgjedhje të parakohshme” – Kështu i është përgjigjur Ilir Meta (në foto me Berishën në seancën e votimit të Nishanit), pyetjes së gazetarit Alfred Peza në një intervistë në emisionin e tij Debat në Vizion Plus. Në grupin e pyetjeve për zgjedhjen e Presidentit të ri, pyetjes “Sa pranë zgjedhjeve të parakohshme ishim”, kreu i LSI-së i është përgjigjur: “Absolutisht që në rast se nuk do të zgjidhej Presidenti, do të kishim kaluar në zgjedhje. Ishte e prerë, më 26 korrik do shkonim në zgjedhje”.

Ra në sy që disa “pyetjeve të vështira” andej nga fundi Meta u është përgjigjur duke bërë gallatë me Europianin e futbollit. Pyetjes: “Majko ka shprehur rezerva për takimin tuaj me Ramën”, i është përgjigjur: “Mbrëmë unë kam ndjekur Super Marion, ju paskeni ndjekur Super Majkon…”. Pyetjes nëse i kondicionon lëvizjet me Ramën, me pozicionin e ardhshëm hipotetik të kryeministrit i është përgjigjur: “Dy golat e Balotelit merituan dje të gjithë vëmendjen time…” (e kuptoni vetë ç’vëmendje e çmuar). Pyetjes “pse Koka votoi kundër shkarkimit të Naços” i është përgjigjur: “Lefteri është tifoz i vendosur i gjermanëve dhe unë i kisha thënë vazhdimisht që sot fitojnë italianët…” (A.N)