Tahiri flet për vrasjen e turistëve, krimin ia faturon sistemit të drejtësisë: Nuk duhet të kujtohemi për atë që ndodh, kur ka krisma

Ministri i Brendshëm, Saimir Tahiri, ka folur te “Të paekspozuarit” drejtuar nga Ylli Rakipit në “Ora News”, për vrasjen e dy turistëve çekë në veri të Shqipërisë. Ministri Tahiri ka akuzuar sistemin gjyqësor për vendime të gabuara, që sipas tij, në shumë raste u ka dhënë liri kriminelëve. “Kam shqetësim së pari si qytetar dhe më pas si deputet dhe ministër, për mosfunksionimin e sistemit gjyqësor. Unë besoj se nuk duhet të kujtohemi për atë që ndodh, kur ka krisma. Duhet të kujtohemi kur krisma të heshtura të gjyqësorit shkaktojnë këto situata. Ka shumë raste kur kriminaliteti kthehet, për shkak të vendimeve të gabuara të gjyqësorit. Rasti konkret është filmi tragjik për jetën e turistëve çekë, për autorin dhe familjen e tij dhe na tregon, për punën e madhe që duhet të bëjmë. Ai është filmi i një djali të mitur që sipas meje, nuk ka kryer të gjithë dënimin, por është ledhatuar nga drejtësia dhe i mori jetën dy turistëve të huaj”, është shprehur ministri.

Ndërkohë, ministri ka sqaruar se policia po mbulon territorin aq sa është e mundur, dhe nuk mund të jetë në çdo destinacion turistik, pasi kjo nuk ndodh as në botë. Ndërsa, ka shtuar se zona ku u vranë 2 turistët çekë nuk është zonë me risk të lartë.