Basti i Ramës me drogën: Shtatori 2014

Në shtatorin e 2013-ës, kur Edi Rama po merrte në dorëzim punët e qeverisjes nga Berisha, në Lazarat e fshatra të tjerë të Shqipërisë po korrej marihuana që ishte mbjellë në muajt e nxehtë para zgjedhjeve të 23 qershorit. Policia atëherë, ende “e parilindur” mirë, tentoi të pengonte korrjen e drogës, por në dy raste – në Qafë-Shtamë dhe Shosh – hasi në zjarr armësh më të rënda se sa të sajat dhe u tërhoq pas disa orë shkëmbimi zjarri me njerzit që po mbronin korrjen e marihuanës në shtator 2013.

Sipas televizionit italian RAI-Uno, i cili i referohet vlersimeve të bëra me rekonicion ajror nga Guardia di Financa, vlera në treg e marihuanës së mbjellë para 23 qershorit 2013 arrinte në 4.5 miliard euro. E përkthyer në ton, bëhet fjalë për rreth 450 ton marihuanë të korrur.

Është ajo marihuanë që po kapet tani çdo ditë brenda e jashtë Shqipërisë – deri më sot është kapur rreth 8% e saj. Përqindja mesatare e kapjes së marihuanës kontrabandë nga policitë e ndryshme të botës, sipas OKB-së, është 10%. Me ritmet e kapjes së asaj shqiptare brenda e jashtë vendit, së shpejti kjo përqindje do të tejkalohet. Por në mos 90% e marihuanës shqiptare të korrur vjet, 85%, apo qoftë edhe 80% e saj, do të shkojë në destinacionin përfundimtar. Në mos me avionë të vegjël, me peshkarexha të mëdha, në mos me furgonë të vegjël, me kamionë të mëdhenj, në mos me mushka, me gomerë, njerzit që kanë në dorë një mall që vlen 4.5 miliard euro në treg do ta dërgojnë atë atje – qoftë Edi Rama kryeministër apo jo, qoftë Saimir Tahiri ministër i brendshëm apo jo.

Por Edi Rama dhe ministri i tij i brendshëm, i konsideruar si i shkëlqyer nga ai, do të jenë përgjegjësit kryesorë para opinionit publik të brendshëm e të jashtëm për marihuanën që do të korret në shtatorin e 2014-ës. Sepse do të jetë marihuanë e mbjellë, e vaditur, e prashitur dhe e korrur nën hundën e tyre. Dhe në qoftë se prodhimi i saj do të arrijë përsëri nivelin e 450 tonëve, policitë e Italisë, Greqisë dhe vendeve të tjera europiane do të jenë po aq të mbingarkuara sa sot me ndjekjen dhe kapjen e marihuanës shqiptare.

Drejtori i Policisë së Shtetit deklaroi para ca ditësh se është hartuar një strategji kombëtare për parandalimin e kultivimit të marihuanës dhe, në fakt, 1500 rrënjët e para të kësaj bime u shkatërruan sot nga policia në fshatrat e Vlorës (në shtator këto rrënjë do të prodhonin 1500 kg mariuhanë). Sidoqoftë, mbetet të shihet nëse aksione të tilla do të vazhdojnë përditë e kudo. Sidomos në Lazarat, ku Edi Rama deklaroi se policia do të futet kur ta shohë ajo të arsyeshme.

Perditesim: Nje dite pas publikimit te ketij komenti, policia e Vlorës asgjësoi edhe 965 rrënjë marihuane