Fox News nën thundrën e Roger Ailes-it

816 milionë dollarë ishin fitimet e stacionit televiziv amerikan Fox News vitin e shkuar, duke arritur kështu të rivalizojë Divizionin e Filmit të perandorisë së Murdoch-ut (këtu përfshihet dhe i famshmi 20th Century Fox). CNN-in e ka mundur prej kohësh në çdo pikëpamje, ndonëse ka 1/3 e stafit të televizionit me qendër në Atlanta. Fitimet i ka 50% më të mëdha. Gjysma e fitimeve vjen prej reklamave, dhe gjysma tjetër prej pajtimeve të kompanive kabllore. Shihet nga 100 milionë pajtimtarë, dhe vitin tjetër synojnë të fitojnë më shumë se një milliard dollarë.

Çelsi i këtij suksesi është drejtori egzekutiv, ose – siç e quajnë vartësit etij – “the chairman”. Quhet Roger Ailes, dhe ditën që audience-a e televizionit të drejtuar prej tij u bë më e madhe se sa ajo e CNN-it legjendar, ai organizoi një party. Në atë party, në fillim sytë e të ftuarve kapën në një ekran të madh në mur siglën e televizionit MSNBC, pastaj logon e CNN-it (në të dyja herët, logot u pasuan nga “uuuuu” të programuara), dhe në fund – cilën? Logon e Fox News-it? Jo – fytyrën e Roger Ailes-it.

“Na u duk se po shihnim kryetarin Mao”, kujton Charlie Reina, një ish-drejtues i Fox-it. “Në ambientet e Fox-it është si në Bashkimin Sovjetik, apo Kinë: njerëzit e kanë mendjen të shohin se ç’kanë të tjerët pas shpine. Atje të spiunojnë”, thotë një tjetër ish-drejtues. Ndërsa Jane Hall, një moderator programesh, që ka punuar atje për dhjetë vjet, deri në ardhjen e ‘të tmerrshmit ‘ Glenn Beck, thotë: “Fox News-i është ai. Ai është vizioni. Ai është gjithçka” (në Shqipëri nuk egziston ende kjo lloj monstre; monstrat këtu janë pronarët, jo drejtuesit).”Njerëzit atje kanë frikë nga Roger-i. Mund të duket e çuditshme, por edhe Murdoch-u vetë, pronari i televizionit, ka frikë nga Roger-i. Suksesi i ka dhënë shumë pushtet”, shprehet Michael Wolff, që e njeh mirë manjatin australian. Dhe është ky i fundit, që i ka thënë në mirëbesim një miku: Roger-i është i marrë. Ai i beson vërtet ato që thuhen në atë televizion”.

Dhe televizioni i tij është si ai: paranojak, i terrorizuar nga armiqtë, intolerant, fanatik, frikë-mbjellës, partizan. Rezultati i këtij televizioni është budallallespja e shikuesve. “Ky është dëmi më i madh që po i bën Amerikës Roger Ailes-i”, thotë pak a shumë reporteri politik, Tim Dickinson, në shkrimin e vet në gazetën the Guardian.

E.G.