Dosja “Imami”, merren në pyetje 9 anëtarët e Komisionit të Vlerësimit të Ofertave

Prokuroria e Tiranës ka nisur marrjen në pyetje të 9 anëtarët e Komisionit të Vlerësimit të Ofertave në Ministrinë e Mbrojtjes, të cilët janë përfshirë në shkeljet për të cilat akuzohet ish-ministri i Mbrojtjes, Arben Imami. 

Dosja “Imami” kaloi gjatë ditës së sotme nga Prokuroria e Përgjithshme të Prokuroria e Tiranës, ndërsa pritet të përfundojë edhe marrja në pyetje e anëtarëve të Komisionit të Ofertave të Ministrisë së Mbrojtjes. 

Këta persona, të cilët janë marrë në pyetje më parë, do të pyeten sërish lidhur me kriteret që janë përdorur në pranimin e ofertave dhe lidhur me bazën ligjore ku janë mbështetur për shpalljen fituese të një kompanie të caktuar mediatike. 

Pas vlerësimit të kësaj çështjeje, do të vendoset më pas marrja ose jo në pyetje e ish-ministrit Imami. Ky i fundit u akuzua nga Ministria e Mbrojtjes për shpërdorim detyre dhe shkelje të barazisë në tendera, duke abuzuar me një fond prej 1.2 mln dollarësh.

SHEKULLI