Përralla se "Shqipëria është Europë"

Kryeministri i Shqipërisë, Edi Rama, po këmbëngul përherë e më shumë në tezën e tij se Shqipëria jo vetëm do të hyjë së shpejti në Europë, por se madje është edhe si standard shumë afër Europës. Meqë është fushatë elektorale, ai preferon të sjellë shembuj konkretë. Nga Athina ai solli një shembull me një taksist:

Një taksist më tha që ‘kur erdhëm ishim 100 shkallë më poshtë se këta këtu, sot jemi një shkallë larg tyre. Jemi gati për ta ngjitur dhe për t’u bërë njësh me të gjithë evropianët e tjerë, duke u ulur në sofrën e përbashkët të familjes së bashkuar evropiane.

Më vjen mirë që sot që kemi ardhur këtu jemi në gjendje të ndajmë jo vetëm atë që kemi bërë për ta ngritur Shqipërinë aty ku nuk kemi qenë asnjëherë, por për ta ngritur në një pikë ku ëndrrat dhe shpresat nuk duken më aq të paarritshme sa dukeshin dikur.

Ndryshe nga koha kur morëm detyrën, sot Shqipëria është një vend që e ka në dorë fatin e vet. Sot, fati ynë është në dorën tonë

ka thënë z. Rama.

A është kështu? Ndoshta. Në një univers të fragmentarizuar ndoshta përthyhen edhe perceptimet. Ndoshta z. Rama jeton dhe interpreton një Shqipëri të vetën. Të tjerët një të tyren. Por ta analizosh kështu një situatë apo një vend, nuk bën politikë dhe as harton dot politika. Shifrat nuk justifikojnë asgjë nga këto që thotë z. Rama dhe mjafton të shohësh emigrimin në masë që nuk është propagandë keqdashëse, por fakt.

Pagat mund të jenë vërtet aty ku thotë z. Rama dhe e parë nga një kënd ai ka të drejtë të thotë: kemi bërë shumë. Ose nën qeverisjen time është bërë shumë. Por kur themi që cilësia e jetës është afër standardeve më të mira këtu ka dallim. Dhe me cilësi jete nuk kemi parasysh kaloritë që marrim në një vakt, as edhe kohën e lirë që kemi mundësi ta vrasim. Pasi fundja Shqipëria ka qenë, është dhe mbase do të jetë, i vetmi vend ku dy gjërat më të vyera: Koha dhe Mendja, Vriten!

Me cilësi jete kuptohet një raport me të ardhmen, me kualifikimin, me sigurinë juridike dhe personale, por edhe me zhvillimin e aftësive në një mjedis konkurues. Nuk i ka Shqipëria këto. Të mos bëjmë sikur nuk e dimë. Shqipëria është një vend që kënaq vetëm pushtetarët, jo qytetarët. As edhe ata që mendojnë disi për të.

Arsyet janë komplekse, por për sa i takon, z. Rama ka një përgjegjësi të pamohueshme: ai shëprdoroi një besim shumë të madh që iu dha. Nuk e shndërroi atë votë të njëpasnjëshme në një qeverisje të drejtë dhe më të mirë. Sikur të shohim vetëm mënyrën sesi partia e tij sillet me të ndëshkuarit për korrupsion do të kuptonim që vetëm llogaridhënie nuk ka.

Nuk ia vlen të vazhdohet më tej. Vetëm se kjo retorika e krahasimeve me Europën, ku Europa poshtë nesh është përherë Greqia, është një dredhi që nuk ka aspak lidhje me të vërtetën dhe një minimum dinjiteti.

Ne emigruam të detyruar, por krijuam jetën tonë, këtu, apo në Greqi e gjetkë, me zgjedhje. Sepse mund të iknim apo ktheheshim. Përçmimi i z. Rama për një vend apo një tjetër, nuk i shërben ofertës festive të Shqipërisë si Kopshti Shkëmbor i Europës Juglindore. Sepse secili e di vetë ku i pikon çatia dhe të gjithë pastaj e dinë si një konstante historike se Shqipëria është një shtëpi pa çati.

s.zaimi