Edhe “Johnson&Johnson” nën lupën e EMA-s

Rregullatori i ilaçeve i Bashkimit Evropian, EMA, do të vlerësojë vaksinën e prodhuar nga Johnson & Johnson's, pas konstatimit të katër rasteve të mpiksjes së gjakut, raporton DW. Vaksina anti-Covid “Jansen” në katër raste në SHBA dyshohet se është pasuar me një efekt të tillë.

Sipas Komitetit të Vlerësimit të Rrezikut të Farmakovigjilencës në EMA, njëri prej rasteve është regjistruar gjatë testeve klinike dhe tre të tjerë gjatë fushatës së imunizimit në SHBA. Një nga rastet ka përfunduar me vdekje.

Aktualisht vaksina “Jansen” është në përdorim vetëm në SHBA, por pritet shpërndarja e saj në BE pritet brenda javëve të ardhshme. EMA e ka dhënë autorizimin për përdorimin e saj në mars. Agjencia thotë se rastet po hetohen dhe aktualisht nuk është e qartë nëse rastet e mpiksjes së gjakut janë të lidhura me vaksinimet.

Dilemat në lidhje me vaksinën e re në Europë pasohen nga rastet e mpikjes së gjakut që ndaluan për disa ditë fushatën e vaksinimit me AstraZeneca.