"Pamundësia" për të furnizuar me ujë Tiranën sipas Veliajt

Kryetari i bashkisë së Tiranës, Erjon Veliaj në një intervistë për gazetarin Lutfi Dervishi, në Televizionin Publik Shqiptar ka folur për problematikën e furnizimit me ujë të kryeqytetit si dhe vendimin  per rritjen e çmimit të ujit.

Zoti kryetar i Bashkisë 67 % e ujit në kryeqytet që niset nga burimet drejt çezmave tona nuk krijon të ardhura. Pra në 100 litra ujë, 67 janë humbje, nuk sjellin të ardhura: janë humbje teknike, dhe humbje administrative, shqip vjedhje dhe abuzime. Pse nuk i kërkuat ujësjellësit të ulë humbjet po i kërkoni Entit Rregullator të Ujit të rrisë çmimin?

Veliaj: T’ju shpjegoj se kam përshtypjen ngatërroni diçka, ujin që shkon nga depo në çezmë, ngatërroni ujin që vjen nga burimi dhe shkon në Bovillë për t’u filtruar ose shkon në depot e filtrimit.

Çfarëdo lloj ngatërrese të bëjmë, 70% është humbje!

Veliaj: Një sekondë, po ta shpjegoj! Që kjo humbje të zgjidhet, ne duhet që tubat e kohës së xhaxhit që janë penetruar, çarë të ndërrohen. Kostoja për t’i ndërruar këto tuba është 50 milionë euro. Mënyrë …

Tirana nuk ka rrjetin e keq, por ka mangësi, humbjet nuk i ka nga amortizimi i rrjetit, por nga keqabuzimi dhe vjedhjet – deklaratë e ish drejtorit të ujit në dhjetor 2015, ç’ka do të thotë, jam shumë dakord që ka nevojë për ndërhyrje, por humbjet më të mëdha janë keqadministrimi dhe abuzimi.

Veliaj: Nëse do ishte i aftë ky person nuk do ishte ish – drejtor i ujit, do ishte drejtor i ujit. Fakti që është ish drejtor i ujit do të thotë që nuk e bënte këtë punë.

Dhe këto të dhëna i ka të gabuara…

Veliaj: Jo nuk po flas për këtë. Kur ju thoni uji që shkon në çezmë dhe çfarë faturohet, ne marrim 93%, pra çfarë të futet në sahat që faturohet dhe çfarë mbledh Bashkia është në rezultatin e vet më të mirë të 27 viteve.

Është 100% mbledhje e arkëtimeve, se keni mbledhur edhe…

Veliaj: Mbledhim edhe borxhet, pra ne kemi kapur maksimumin, jo vetëm kaq, por edhe furnizmin, çfarë furnizohet në rrjet ka qenë 7 orë, sot është 13 orë, pra thuajse dyfishi. Ti në shtëpinë tënde e ndjen 24 orë se ngaqë ke depozitë, ti gjithnjë kur e hap ka ujë. Çështja është se nuk e ndërpresim dot se po s’u bë 24 orë, sikur edhe 23 orë të jetë furnizmi, ti mund ta hapësh çezmën në atë orë që s’ke, pra do mbash depozitë deri sa të ketë 24 orë non stop. Kostot që kemi llogaritur, përveç këtyre investimeve janë: Për të shtuar kapacitet filtruese dhe për burime të reja. Ne na duhen burime nga zona të tjera të Tiranës, sepse ne i kemi shteruar. Një pjesë e zonave që vazhdon me pus është komplet e ezauruar, sidomos zona e Laknasit, Bërxullit, Mëzezit, Yrshekut, Kasharit. Për të bërë këtë investim, për të ndërruar qoftë vetëm tubin nga Bovilla deri në depot partitare në Tiranë, vetëm ajo kushton 20 milionë euro. Me investimin tonë, me fitimet që kemi nxjerrë, pra me faktin që  kompania po performon jashtë mase mirë në terma financiarë, ne vetëm për të ndërruar një tub duhet të presim katër vjet, pra me nga 5 milionë në vit. Për të bërë të gjithë investimet, se ju thatë pyetja 1 milionë dollarshe. Jo në fakt, se pyetja është 220 milionë dollarësh, se aq është fatura që JAICA, Agjencia e Zhvillimit Japonez që ka bërë studimin fillestar tregon se çfarë do të thotë të kesh ujë 24 orë në Tiranë. Ne, 220 milionë dollarë me ritme nga 5 në vit, na duhen të paktën 44 -45 vjet që të bëjmë këtë investim.

Nga të gjithë specialistët, njerëzit që kanë njohuri për fushën, në mënyrë të drejtpërdrejtë më kanë thënë që do të duhet të rritet çmimi i ujit, por çështja qëndron tek ulja e abuzimeve që janë jashtëzakonisht të larta dhe në një analogji me energjinë elektrike. Nuk ishte thjesht rritja e çmimit të energjisë elektrike që çoi në përmirësimin e performancës, por ishte disiplina e fortë dhe goditja e fortë ndaj abuzuesve. Kjo është çështja.

Veliaj: Arsyeja pse po vë buzën në gaz është se përpara se të fillonte emisioni, task-forca e ujit dhe kjo është komplet rastësore më çon fotot në shtëpinë e një politikani që sigurisht do gjobitet, do mbajë përgjegjësi, ku po mbushej pishina me ujë, ndërkohë që unë kam shpallur gjendje emergjence, pra për të ilustruar dhe para se të niste sigla isha duke u marrë me aksionin.

Aksionin për ndërprerjen e ujit, ju e keni filluar në mes të korrikut, ose në fund të qershorit.

Veliaj: Patjetër

Noe, nga Bibla nuk e filloi ndërtimin e arkës ditën që binte shi.

Veliaj: Jo! Ne kemi dy vite. Si mendon ti, që kjo performancë 93% u bë brenda ditës?! Ka dy vjet që ka filluar.

Flasim për ndërprerjen e lidhjeve të paligjshme.

Veliaj: Të gjitha, sepse një pjesë e madhe e arkëtimit vjen nga lidhja e paligjshme që bëhet e ligjshme, Ti thua e kë bërë këtë pa leje, tani do të të vë sahat dhe kjo nuk kërkon prerje. Kjo thjesht kërkon legalizim e formalizim, pra një pjesë e madhe e rritjes së arkëtimit dhe fakti që ka dalë kompania me fitim është se prerjet e paligjshme janë kthyer në lidhje të ligjshme, u është vënë sahat, u ka ardhur edhe fatura. Njerëzit duhet të kuptojnë që uji është një mall si çdo mall tjetër. Siç ke blerë sot letrën, gota, kostumin, ke paguar paratë. Do të thotë që ky është një mall që po ashtu do paguar. Fillimisht ishte formalizim…

Pra, një mall që nuk duhet trajtuar si mall i babait.

Veliaj:Formalizim…Të lutem, kur është një situatë emergjence, ne bëjmë një masë, një shkallë tjetër masash. Fjala vjen, mbushja e pishinave. Ai thotë, unë e paguaj. Dakord, e paguan, por s’ke për ta ndërruar tani, sa të kalojmë ne këtë fazë emergjence.

Vatikani ndërpreu ujin në shatërvane për këtë masë emergjence

Veliaj: Ekzakt

Çështja qëndron, 74% e abonentëve janë me matës, 26% janë pa matës. Ky është një tregues tjetër i performancës së UKT që mund ta përmirësojë dhe nuk po flasim thjesht për familje e biznese. Në vitin 2017, biznese, fabrika, hotele pa matës ..

Veliaj: Nuk kemi hotele e biznese pa matës. Këtu bëhet fjalë…

Biznese pa matës të cilët janë në kundërshtim me rregulloren e furnizmit me ujë.

Veliaj: Këtu bëhet fjalë për numra NIPT-i të cilët kanë shpallur dhe janë jo aktivë dhe në atë moment, sigurisht që matësi del jashtë funksionit, në momentin që numri i NIPT nuk është aktiv, është i lidhur edhe me Tatimet. Pra, këtu bëhet fjalë për anomali të kësaj natyre. Jo të gjitha bizneset punojnë me ujë, një studio avokatie nuk punon me ujë. Në momentin që një studio konsulence ka ndërprerë numrin e NIPT-it i është ndërprerë edhe faturimi dhe ka një faturim afrofe servisi, prandaj quhet pa matës, se nuk i shikohet më matësi për sa kohë është e mbyllur dhe ne kemi vetëm një faturë vjetore derisa të mbyllet ai si vend.

26% janë pa matës, që do të thotë në 100 njësi, familjarë dhe jo familjarë janë pa matës.

Veliaj: Kjo nuk do të thotë që nuk faturohen, pra ne kemi trashëguar nga ish-komunat. Mos harro që Tirana që kemi sot …

Afrofe.

Veliaj: Po, sigurisht që faturohen, pra paguajnë, kanë një sistem në varësi të fshatit dhe gjendjes ekonomike. Po, është e vërtetë, ne jemi duke “blinduar” fillimisht Tiranën dhe në fshatin Bizë të Martaneshit akoma nuk ka vajtur aksioni. Pse? Sepse unë besoj që fillimisht konsumatorët më të mëdhenj por edhe abuzimi më i madh me ujin ndodh në zonat e mëdha të banuara. Është vetëm çështje kohe sa të jemi, por të nxjerrësh faturën me matës dhe jo me afrofe nga Biza e Martaneshit, fshati ynë fundor në majë të malit është si të nxjerrësh “dhjam nga pleshti”. Këtu, po flasim për 220 milionë euro investim dhe nëse ju mendoni që 14 familjet e fundit që kanë ngelur në fshatin Vilës së Zall-Bastarit…

Ju një vit më parë…

Veliaj:Nëse ka statistika që tregojnë sa është rritur arkëtimi, sa janë rritur faturimet, sa janë rritur të ardhurat, sa është rritur investimi 109 %, unë them ne kemi kapur maksimumin, pra kompani me efiçencë, edhe privatët s’kanë efiçencë më të mirë se sa Bashkia e Tiranës, kur vjen puna tek optimalizimi i asaj që quhet kesh-flow i të ardhurave. Kemi bërë një plan me ekspertët më të mirë, kemi punuar me Ujësjellësin e Budapestit, të Amsterdamit, të Barit, me ekspertë të USAID dhe kemi arritur në këtë konkluzion: Po të duam ujë 24 orë, ne duhet të bëjmë këtë ndryshim, sepse ne sot jemi të pakreditueshëm.

Nëse ne do të duam ujë 24 orë dhe sigurisht që e duam, saktësisht një vit më parë, keni thënë në 25 korrik, brenda dy vitesh ne sigurojmë ujë të pijshëm 24 orë. Ish drejtori i ujësjellësit për të cilin ju e dhatë një konsideratë, më 20 dhjetor 2015 tha se brenda 3 vitesh do të kemi ujë 24 orë. Ku ta gjejmë ujin, së paku fuqinë që të besojmë se brenda pesë vitesh Tirana do të ketë ujë 24 orë.

Veliaj:Po ta shpjegoj. Për sa kohë që vazhdon dhe citon dikë që unë e largova nga puna pikërisht se ishte i paaftë edhe të parashikonte , dhe të hartonte një plan biznesi, nuk kam se çfarë t’ju përgjigjem. Përgjigja ime më e mirë për këtë ishte fakti që e largova. Pra një njeri që nuk ia kishte idenë dhe …

Citoj një njeri që ju nuk mund ta largoni dot?

Veliaj:Një sekondë, më lër të përgjigjem për këtë. Kur i bie ndërmarrjes si çifteli me veshë, sigurisht që kjo nuk qëndron. Atëherë kam kërkuar që të bëhet një plan biznesi me ekspertizë të huaj. Bashkë me ekspertët e USAID është hartuar ky plan biznesi. Ne dje kemi dhënë opinion jo për çmimin e ujit, për këtë plan biznesi. Çmimi i ujit edhe me vendimin është më i lirë se Bathorja. Bathorja e ka 65.7 me Paskuqanin, zona më depresive ekonomike e Shqipërisë. Në këtë sens , këtë 20 lekëshi që po luan Bashkia e Tiranës, e cila bën që ne të aksesojmë kredi, do ta paguajmë sot, apo do të presim 45 vjet me këtë ritëm?! Kaq e thjeshtë është.

Një prej argumenteve tuaja për rritjen e çmimit të ujit është se Korça e ka çmimin kaq, 65 Bathorja, Shkodra kaq, dhe kështu që Tirana nuk mund të mbetet pas shoqeve të veta dhe duhet ta rrisë çmimin…

Veliaj:Jo nuk thashë këtë. Nuk e rritëm se e ka Korça, aq. Thashë kjo rritje është e nevojshme për Plan Biznesin tonë, edhe prapë është më pak se sa e kanë rritur të tjerët që janë qytete më të dobëta…

Po çfarë lidhje kanë ato me këtë gjë? Çmimi është në varësi të kostos, asnjë nga 56 shoqëritë aksionere nuk e ka çmimin e njëjtë.

Veliaj:Ja ta shpjegoj unë çlidhje ka. Ne pamë që kishte një lidhje direkte midis çmimit dhe fuqisë për të investuar. Korça e ka 99 lek, ka ujë 24 orë. Pogradeci e ka 98 lek dhe ka ujë 24 orë. Qyteti tjetër që vinte në radhë, Lezha, prapë më të lartë  dhe ujë 24 orë. Pra kishte një korrelacion midis fuqisë për t’u kredituar nga bankat për të bërë  këto investime që nuk ishin bërë prej 27 vitesh, dhe çmimit të ujit. Dhe ne cituam që megjithë këtë plan ambicioz, ne prapë jemi te niveli Bathores dhe jo si tek niveli i Korçës.

Për shkak se Korça, nëqoftëse e ka këtë çmim kaq të lartë, nuk e ka ujin si Tirana me rrjedhje të lirë

Veliaj:Nuk është uji i Tiranës me rrjedhje të lirë.

Mbi 90 për qind?

Veliaj:Jo e merr në Qafë Mollë, zbret poshtë me rënie të lirë, pas malit të Dajtit, e merr elektro-pompa.

Baseni më i madh ujëmbledhës është Bovilla, i planifikuar për 1 milionë banorë dhe është me rrjedhje të lirë…

Veliaj: Ai është një prej burimeve. Bashkia e Tiranës vetëm faturën elektrike të pompimit të Qafëmollës e ka 400 mln lek.

Mund të shlyeni me hidrocentralin e Lanabregasit?

Veliaj:Jo se me hidrocentralin e Lanabregasit ne bëjmë gjithë ndriçimin e Tiranës dhe gjithë  Net-Off-in që bëjmë me energjinë elektrike. Po fusim në rrjet energji  fusim në rrjet energji që ne tashmë e marrim për të gjithë përdorimin që ne i bëjmë ndriçimit në qytet dhe prodhon 3 Mega dhe jo gjithmonë. Duke qenë se varet nga ujërat,  jo gjithmonë është një prodhim energjie konstant. Prandaj ne na duhet lidhja në rrjet që gjithmonë te kemi motorpompa që funksionojnë  në mënyrë konstante.

Citoj një njeri që ju nuk mund ta largoni dot nga puna. Jemi ende në një proces negociatash dhe dua të garantoj qytetarët që do të bëjmë më të mirën derisa të bindemi se kemi marrë ofertën më të mirë për UKT, çmimi do të caktohet nga Enti Rregullator i Ujit. Deklarata është 24 gusht, deklaratë e juaja dhe flisnit për privatizim. Brenda një viti ndryshuat strategji, nga privatizimi te rritja e ujit? Për ta privatizuar më pas apo për ta lënë pronë publike?

Veliaj:Për ta shëndoshur kompaninë që të japë ujë. Ajo që kuptuam është që kompanie kishte një atraksion fillestar në momentin që ishte vetëm qyteti i Tiranës. Në momentin që u shtuan zona të ish-komunave, atraksioni ra.

Ujësjellësi ka qenë një kompani pavarësisht se bashkia u zgjerua.

Veliaj: Sepse pamë në bilancet tona që një pjesë e madhe e gjithë zonave rurale ishin komplet në të zezë ose në çmime jokonkurruese me tregun. Dhe fare, fare larg kostos. Kështu që kur kërkova që të kalonim nga bërja e bilanceve në mënyrë dëshirore tek një auditim, kur mbaroi auditimi…

Me kë u bë auditimi?

Veliaj: Me një nga kompanitë kryesore.

Në nëntor 2015 ju keni thënë  që do të auditojmë ndërmarrjen për të kuptuar në nivelin teknik dhe financiar se çfarë nuk shkon në këtë kompani dhe ku duhet të shkojnë investimet e reja. Dhe më pas do të kalojmë në një fazë investimesh ku sëbashku me ujësjellësin e Pulias do të sigurohemi që çdo cent që shpenzohet të ketë një dobi konkrete. Vazhdon ky projekt apo ka ndryshuar?

Veliaj: Ne kemi bërë këtë audit i cili na nxori gjithë këto anomali, furnizimin me puse të zonave të tëra të Tiranës, siç është zona e Unazës së Re ose në Kashar, dhe ajo që kemi bërë është që investimet shkuan nga 30 për qind, në 109 për qind. Pra ne të gjitha ato që nxjerrim nga ujësjellësi i kemi kthyer në investime. Besoj se mjafton një xhiro nëpër Tiranë për të kuptuar se çdo cent po shkon për investime. Pyetja është kjo, ne na duhen investime në shifra 220 milionë euro për të pasur ujë 24 orë. Me shifrat që kemi aktualisht nga 5 milionë në vit po them që na duhen 45 vjet. Kjo është një gjë komplet transparence.

Çështja është tek ulja e humbjeve teknike?

Veliaj:Më thuaj si ulen humbjet teknike sepse të gjithë ekspertët thonë që duhet një tub që nuk çahet. Vetëm, ky i Bovillës kushton 20 milionë, a i keni lekët, ja kjo është si ulet. Se unë polic çdo njeriu që shkon e vjedh nuk i vë dot se aq policë kam. Shteti shqiptar nuk ka.

Domethënë një fushatë për të disiplinuar…

Veliaj:Të lutem kjo nuk është fushatë. Kjo është edhe fushatë për të disiplinuar dhe më vjen mirë që kryeministri e ka vendosur këtë, policia bashkiake nuk arreston dot më. Duhet policia e shtetit dhe na duhet një aksion madhor. Unë e kam filluar në Tiranë. Gjithë policia e Qarkut Tiranë ka 2 mijë policë. Ne vetëm në një javë kemi kapur 1600 veta që vjedhin ujin. Pra 1600 veta që çajnë në mënyrën më primitive tubacionin kryesor të ujit.

Për të pasur një eficencë maksimale ndiqet parimi T-T-T, Taksë-Transfertë-Tarifë. Pse kërkoni të merret vetëm njëra nga këto elemente për të rritur tarifën e ujit dhe nuk shihni mundësinë që edhe qeveria të mund të kontribuojë sepse edhe qytetarët dhe bizneset e Tiranës, janë kontributorët më të mëdhenj. Edhe grantet mund të shikohen si mundësi. Edhe vetë bashkia mund të investojë dhe jo thjesht që kjo barrë e madhe investimi t’i mbesë banorëve.

Veliaj: Ne kemi planifikuar që nga kreditë ne të marrim vetë 170 dhe 50 të tjerat do të duhet t’i negociojmë ose me donatorë ose me grante. Kjo nuk i mbetet vetëm banorëve. Paketat e kredisë do jenë në bazë të projekteve. Pra fjala vjen, për një projekt të Bovillës, ne na duhet të negociojmë me BERZH, për një projekt tjetër të Gurit të Bardhë jemi duke negocionuar dhe jemi duke parë, edhe donatorë ose Banka zhvillimi me interesa apo kredi të buta. Kështu që për secilin prej këtyre investimeve po shohim mundësitë më të mira dhe me t’u krijuar qeveria e re dhe të fillojë aktiviteti normal, sigurisht….

Një argument që keni përdorur ka qenë që Lanabregasi ka qenë një barrë financiare.  Ka qenë barrë financiare apo leverdi financiare?

Veliaj:Barrë. Dhe jua shpjegoj se pse. Në vitin 2012…

Po por para kësaj….27 qershor 2016 në një postim tuajin në Twitter keni thënë që Tirana është e vetmja bashki që ka hidrocentral që prodhon energji dhe ujë të pijshëm. Keni ndryshuar mendje?

Veliaj:Ky ujë është shumë i dobishëm. Problemi është që nëse ketë ujë e ke blerë 10 mijë euro, ky ka dobi që unë të shuaj etjen tani, por a ia ka vlejtur 10 mijë euro?! Patjetër është mirë që një qytet e ka një hidrocentral. Pyetja është kur e ke paguar sa frëngu pulën, thua tani nuk shqetësohem më për cilësinë e ujit që sapo piva, por po shqetësohem për faturën që më ke sjellë?

Ju mendoni se nga ana financiare ka qenë barrë sepse ka qenë për 5 vite dhe duhet të ishte shlyer tashmë kredia?

Veliaj:Po dhe nuk është shlyer. Dhe unë jam ende duke paguar sot sepse nuk ishte paguar. Pra gjithë këta ish-at që më citon….

Që këta nuk e paguajnë e kuptoj, por që banka toleron mospagesë kredie sigurisht që kjo është e çuditshme…

Veliaj: Po çfarë do bëjë, ka kolateral , ka marrë peng ujësjellësin, peng në kuptimin financiar të fjalës. Pra është vënë peng ujësjellësi për të marrë një kredi për t'i dhenë lekë Saliu në 2012 që të kishte të mbyllte buxhetin e të jepte rrogat. Pra, këta që sot ulërasin për ujin, këta e falimentuan ujësjellësin, jo vetëm kaq, por e detyronin ujësjellësin të blinte gjëra, për të cilat nuk kishte nevojë. ( sa mirë që kemi hidrocentral, por ne se kishim nevojë) të tjerët që nuk kanë hidrocentral, bashkitë si  jetojnë? Thjesht marrin nga rrjeti. Pra, na shiti shtrenjtë një gjë për të cilën nuk kishim nevojë, e cila sot duhet paguar. Duke qenë se kemi ekspozimin ndaj kredive të këtij niveli, çdo kreditor tjetër thotë, më fal, ti e ke kapur limitin e kredisë, të ardhura shtesë nuk ke, fuqi të paguash më nuk ke, ti po nuk krijove të ardhura shtesë e kemi të pamundur që ne të financojmë.

– Po sikur të them, uji që është në atë gotë, është ujë i marr direkt nga çezma, do ta pinit me atë vrull që e morët pak më përpara?

Veliaj: Edhe e kam pirë, edhe e bëjmë këtë ekzibicion kur të duash, jam fizik i fortë…

-Çështja është…

Veliaj: ..a është sot i pijshëm. Kjo është një tjetër arsye pse po bëhet kjo…

-Se ne po themi do rrisim çmimin e ujit, por gjithmonë kemi harruar të themi, uji i pijshëm. Do të jetë uji i Tiranës, uji i pijshëm?

Veliaj : Në 24 orë furnizim pas 5 vjetësh uji do të jetë i pijshëm. Arsyeja se pse sot nuk është i pijshëm, nuk është se uji nuk pastrohet. Përkundrazi, të bësh testin në Bovillë është identik me të njëjtën cilësi që është në të gjithë BE-në

Testi bëhet çdo orë?

Veliaj: Jo çdo orë, bëhet çdo 20 minuta, pra 3 herë në orë testimi i ujit. Problemi është që kur uji vjen dhe rri në depozita dhe nuk vazhdon të rrjedh deri në çezmë dhe rri në një depozitë që mban ujë të ndenjur  prej kohësh, uji që vjen nga depozita, dekantimi që ndodh, mungesa e pastrimit nga administratorët. Pra njerëzit mendojnë se kosto e ujit është vetëm fatura e ujit. Jo, kosto e ujit është depozita, është pompa, është energjia elektrike, janë ngricat ku ajo nga 500 litra kthehet në 500 kg shkëmb që mund të të bjerë nga tavani në dhomë të gjumit…

 Ju planifikoni që ta bëni me faza, me zona, ka një plan të qartë? Nisët një aksion për Ali Demin…

Veliaj: Në disa zona, burgu i grave, Kodra e Priftit…

Kodra e Diellit…

Veliaj: Kodra e Diellit akoma. Kodra e Priftit akoma nuk është 100%, tashmë ka filluar, por kjo vlen vetëm prej fatit dhe rastit që ata janë shumë pranë depos dhe prej presionit të depos aty rrjeti është gjithmonë i karikuar. Por, pa e bërë 24 orë, edhe sikur 23 orë të jetë, nuk mund të heqësh depozitën sepse mund të kesh nevojë atë orë. Arsyeja pse Tirana ka 24 ujë sot, ose një pjesë e madhe ndihet sikur ka, është se është uji i depozitës. Pra, në ato 13 orë që bashkia  sjell ujin, mbushet mjaftueshëm depozita dhe ti ke ujë 24 orë dhe shumica e Tiranës nuk e ndjen këtë bisedë që po bëjmë. Por po them, ka ardhur realisht koha që të shikojmë edhe këto kostot e tjera. Nuk është vetëm kosto e faturës. Është uji që blejmë me shishe, pikërisht kjo është një arsye më shumë pse po e bëjmë, uji që blen me ato 5 litroshet për gatim…

Tani po thoni që pas 5 vitesh,….

Veliaj: Po them që nëse ne lejohemi dhe marrim ok  e ERRU-së ne për 5 vite me këtë investim, me këtë propozim që na kanë bërë edhe donatorët për të ndërhyrë në këto pika nevralgjike ne do kemi ujë 24 orë me më pak se çmimi që paguhet në Bathore, ku 2/3 janë me ndihmë ekonomike.

Më lejoni të lexoj një deklaratë të shkurtër të një grupi të këshilltarëve të LSI-së, ditën e mërkurë "Uji është pasuri kombëtare, duhet rritje e faturimeve që janë në nivel skandaloz që nuk kalon 30% të prodhimit për luftën kundër informalitetit dhe lidhjeve të paligjshme të shumë bizneseve të deputetëve të PS apo bizneseve të klientëve të pushtetit, me fabrika birre, me fabrika pijesh, frekuese apo alkoolike, me pika karburantesh që përdorin pa kontratë ujin e pijshëm, lavazhe, me dhjetra biznese të tjera te zona e Freskut, në Tufinë, në Unazën e Re, apo në të gjtihë autostradën deri në Vorë". Kjo pjesë e kësaj deklarate, sa e përgjithshme duket dhe e detajuar? Keni një koment për këtë deklaratë?

Veliaj: Jo, i kam kërkuar grupit të LSI-së të më thotë ekzaktësisht, siç të tregova taks-forcë që kishte vajtur tek shtëpia e një politikani që ndërronte ujin e pishinës kur ne kemi shpallur gjendje emergjente. Në të njëjtën mënyrë i kam kërkuar, është mirë të më thoni ku?

Keni marrë përgjigje mbrapa?

Veliaj: Akoma s;kam marrë, por besoj do na thonë ekzaktësisht ku janë identifikuar  këto sepse në dijeninë time ne krehim çdo rrugë dhe kemi bërë një reprezalje të paimagjinueshme më përpara në Tiranë për çështjen e ujit të pijshëm. Por si të them, këtu në TVSH jeni të gjithë të paaftë. Pyetja që do më thuash, kush nga ne është i paaftë? Pra, me kë e ke nga ne këtu? Është si të them , në Shqipëri janë të gjithë mafiozë, të gjithë merren me drogë, jo nuk merren të gjithë në Shqipëri me drogë. Një të huaji i thua, ore ma thuaj, kush merret?

Ju kërkoni adresa konkrete…

Veliaj: Dua ekzaktësisht ku do çojmë të ndërhymë, teksa ne po krehim çdo rrugë.

Për ta mbyllur këtë pjesë, sa i përket aksionit tuaj që ju e keni vënë në vijë. Gjatë gjithë kësaj kohe kemi folur për ujin e pijshëm, por problemi më i madh janë ujërat e zeza. Lana që parakalon, Bulevardi Tiranës që është i mbushur me ujëra të zeza në atë pikë që … nuk ka gjallesa të gjalla. Pse flasim për një gjë që është e rëndësishme uji i pijshëm, por një problem akoma më i madh janë ujërat e zeza të Tiranës, nuk është se kemi ndonjë debat, ose një perspektivë të qartë se çfarë do të bëjmë.

Veliaj: Nuk kemi një debat sepse shumica e qytetarëve ndjeshmërinë e kanë më shumë për ujin që vjen dhe nuk shqetësohen më pastaj pasi shtypin galixhanin ku shkon uji. Ne kemi trashëguar një sistem ku kolektori kryesor ishte Lana. Sot nëse bën rrugën, për ta ilustruar rrugën, nga Kombinati Ushqimor deri në Kombinat Tekstil e shikon që po hapen disa puseta gjigante anash rrugësh dhe shikon që janë xhepa ku po punohet me vinç dhe me sonda, janë pjesë e rrjetit, të cilat për gjysmën, pra nëse Lana shkon për poshtë për gjysmën e djathtë të Tiranës, nga ana e djathtë e Lanës, të gjitha në fakt nuk do shkojnë në Lanë, do shkojnë në kolektorin paralel me Lanën, që është momentalisht duke u investuar dhe do të shkojnë të gjitha në impiantin e përpunimeve në Kashar.

Eshtë kredia e japonezëve

Veliaj: Është kredia e japonezëve.Ky është një rast konkret ku po bashkëpunojmë me qeverinë qendrore. Ne po bëjmë ujin e pijshëm, ata po bëjnë kanalizimet. Prandaj është U-K-T. Ne ujin, ata kanalizimet me këtë kredi dhe kjo kredi në fakt është duke u paguar nga qeveria qendrore, në pafuqinë tonë për ta përballuar.

Më bëri përshtypje këto ditë një deklarim i ish-kryeministrit Meksi, i cili thoshte, uji është pasuri kombëtare, duhet të ketë një çmim të unifikuar, ne jemi shtet unitar nuk jemi shtet federal, duhet të ketë një çmim të unifikuar në të gjithë, a keni një koment për këtë deklaratë?

Veliaj: Ka disa metoda, në disa vende të BE-së çmimi është fiks, në disa vende të tjera, si Italia etj., çmimi nuk është fiks. Kështu që, vende të ndryshme…

Bie në kundërshtim me parimin e decentralizimit…

Veliaj: Vende të ndryshme kanë mënyra të ndryshme. Shumica është në nivel bashkish dhe kompanish publike, në disa të tjera pastaj janë kompani private.  Kompani të famshme janë 3, le të themi menaxherët më  të mëdhenj të ujit sot në Evropë, por edhe në botë. Kështu që disa bashki komplet i kanë kontraktuar dhe funksionojnë për bukuri. Nuk është një kapele që i bën njësoj të gjithëve. E megjithatë e gjykoj që ndoshta ka ardhur në Shqipëri një moment i tillë, por që të ketë 24 orë ujë Shqipëria, kam frikë se duhen të jenë të gjithë 99 lekë sa Korça dhe Pogradeci. Kështu që në këtë sens nuk e di se sa kryetarë bashkie mund ta bëjnë…

Ka vende që e rrisin çmimin e ujit, pasi rritet performanca…

Veliaj: Është si të thuash, këtu bën vapë na duhet një kondicioner. Mirë të bëhet freskët, pastaj ta paguajmë kondicionerin. Jo. Ti investon fillimisht në kondicioner, pastaj bëhet freskët tek studio jote. Është si të them,i, ne kemi nevojë për audio, të dëgjohet njëherë zëri pastaj të vëmë mikrofonin, të paguajmë mikrofonin, jo! Ti paguan njëherë, bën investimin për këtë mikrofon dhe pastaj të dëgjohet zëri. Keni nevojë ëpr filmime, kur të na dali fytyra në tv, atëherë do paguajmë kamerën. Jo, ti paguan kamerën, bën investimin, pastaj të vjen e mira. Në këtë fazë ne nuk bëjmë dot investimin, nuk marrim dot borxh. Ah, po të ishim në një situatë, unë këtë thashë edhe dje, PD nëse ka bërë mea culpa, të kthejë paratë e ujësjellësit dhe unë atë tubin e Bovillës, se nuk flas për një zorrë uji, flas për një gjë që është diametri i imi dhe i yti bashkë përsëgjati. Në këtë sens, nëse ne i kemi këto para, skemi nevojë, bëhemi të kreditueshëm, por të mbytur me borxhe të trashëguara…

Eshtë krejt e qartë nevoja për investime…

Veliaj: Ajo që thotë zoti Meksi mund të jetë një arsye, por thjesht kam frikë se do jetë e pamundur që bashkitë …

Ndoshta bie në kundërshtim me parimin e decentralizimit…

Veliaj: Po jo me nuk kam merak për parimin. Thjesht po them që nëse kjo do i binte si barrë qeverisë qendrore, qeveria qendrore do shikonte sukses Korçën, do t’i bënte të gjithë si Korça. Në mendje racionale këtë thotë. Sot fola me nënën e një mikut tim , Lida nga Korça dhe tha, unë në Korçë paguaj 20 mijë lekë në muaj. Ama, edhe kam kursyer 20 mijë lekë, se totalin thotë, e kishte 40 mijë lekë kur blija çdo ditë 1 mijë lekë vetëm ujë të pijshëm në shtëpinë time. Kështu që, këtë varet si e sheh

Lajm i keq për kompanitë e ujit.

Veliaj: Me thënë të drejtën s’jam duke qarë hallin atyre.

Ju vini nga një përvojë, së paku që nga viti 2003 si aktivist i shoqërisë civile dhe si një njeri i aksionit. E kërkoni aksionin, doni të lëvizni, doni të zhbllokoni situata, përballeni me kriza, të merrni përsipër beteja që ndoshta jo domosdoshmërisht janë të tuajat, siç është edhe çështja e ujit, se uji është rritur edhe më përpara, por nuk ka bërë betejë kryetari i bashkisë, ka qenë drejtori i ujësjellësit me…

Veliaj:Jo, nuk është kështu. Kryetari i Bashkisë ka bërë hile, jo betejë. Pra, në kohën e Lulzim Bashës dhe Sali Berishës uji është rritur 120%.

Nga 20 ne 45 lekë

Veliaj: Po, është 125%.

U shoqëruan me investime që shkuan 10 milionë euro në vit…

Veliaj: Jo, nuk është kështu. 125% u rrit uji pa i pyetur njerëzit fare. Pra unë i bie që e vetmja mënyrë pse goditem është se jam transparent, por mund ta kisha bërë edhe unë me këtë hile. Duke i pasur numrat, duke mos i kaluar fare, duke interpretuar ligjin, Jo! E kam bërë procedurën sipas asaj që kërkon ligji. Me Këshill Bashkiak, me debat, me dëgjesë, me komunikim publik me njerëzit duke sqaruar sa e ka një qytet, sa e ka një tjetër, sa ky 20 lekësh do përkthehet në investime që ne për 5 vjet të kemi ujë 24 orë, pra një analizë të tillë, ajo ka qenë hile dhe largim nga përgjësia. Kështu që në këtë sens çmimi që unë paguaj për transparencën e projekteve , disa njerëz ndoshta i zënë edhe punët në Tiranë, i kap ajo… vetëm nga fakti që ka kantierë kudo dhe sigurisht që kërkojnë që këto të ndalohen, nuk ndalohen! Siç nuk ndalova për sheshin Skënderbej, siç nuk ndalova për këndin e lodrave, siç nuk ndalova për urën tek Ekspozita Shqipëria sot, siç nuk ndalova për Pazarin e Ri. Këtu mund të ketë njerëz nga më të ndryshimt që kanë opinionin e tyre, shumë mirë. Ka një sistem demokratik që thotë, ke ide të bësh jetë publike, po. Dil dhe fute emrin në listë. Po të votoi populli dil dhe bëj idetë që ke. Tani populli më dha besimin për të marrë vendime të guximshme dhe kam thënë unë e di si mund të marrësh më shumë like.Fali të gjitha, bëji të gjitha falas, falimentoje deri në fund, futja edhe gjumit, patjetër merr like për një farë kohe.

E kemi provuar atë periudhën e gjërave falas dhe ka dalë shumë shtrenjtë

Veliaj: kështu që në këtë sens, patjetër që gjërat kushtojnë dhe për sa kohë që kemi një plan biznesi serioz unë jam optimist që po të kemi këtë mbështetje nga ERRU-ja, për të bërë këto investime, thash cilësi Korçe, me çmim Bathore, më ulët se Bathorja, unë them që në 5 vite kemi shans historik  të shpëtojmë nga gjithë jo gangrenë e çështjes së ujit.

Le të qëndrojmë në raport midis aksionit dhe standardit. Në mënyrë absurde nuk ka njeri që të thotë nuk ka lëvizje në Tiranë, nuk ka rrugë më të pastra, nuk ka një përkujdesje më të madhe për çerdhe dhe kopshte, por në anën tjetër vihet re që në vrullin e aksioneve, janë në kurriz të standardeve. Më lejoni t’ju them rruga nga Zogu i Zi, deri në hyrjen e Laprakës janë ndërtuar së fundmi tre stacione autobusi mbi korsinë e biçikletave dhe nëse na ndihmon regjia për ta parë materiali nr.2 do të shikoni një gjë që një mendje normale thotë, si mund të ndodhë kjo gjë? Vendosur stacion autobusi mbi korsinë e biçikletave.

Veliaj: E di ezkaktësisht se çfarë po thoni…

Po ta shikosh…

Veliaj: Po mirë më thuaj, një mendje normale si thotë ku të kalojë autobusi? Se në çdo vend të botës…

Nuk po them për autobusin, po flas për vendosjen e stacionit…

Veliaj: Të lutem, s’ka nevojë ta shoh se unë tërë ditën me këtë punë merrem. Unë e di ekzaktësisht edhe ku janë edhe te shkolla e Partisë, edhe pallati i sportit  Partizani dhe po të shikosh korsia e biçikletave.. devijon..

Ja shikoje, ku devijon kjo? Si kalon ky me biçikletë këtu, po ta shikosh, do shkoj të përplaset me të

Veliaj: Çfarë po thua se nuk e kuptoj?! Të gjitha këto janë zgjidhur kur biçikleta kalon mbrapa.

 Ke raste kur nuk i ke..

Veliaj: Në qoftë se ke një rast do shkoj ta verifikoj, ta rregulloj urgjent në vend, por 3 raste që kam ndjekur vet, të treja janë rregulluar. Pista e biçikletave kalon mbrapa…

Ja shikoje..

Veliaj: Varet si e ke marr këndin, tani dil ma merr këndin ne cep që të shikosh që ky devijon. Tani i bie pse rri shqiptari edhe në korsi të biçikletave, Tani këto janë disa probleme kulturore…Pra, për sa kohë që qytetari vjen, këtu është stacioni i autobusit, me biçikletë devijon mbrapa, kthehet prapë nuk më duket gjëja me dramatike se kështu bëhet kudo në botë. Korsia e biçikletave, duke qenë se ai është mbi rrota, shkon nga mbrapa stacionit të autobusit dhe del prapë aty ku ishte. Nuk më duket gjëja më dramatike.

Blloku Allias. Ndërhyrje shumë e madhe në një zonë gjysmë informale apo informale e plotë, pa trotuare, duket sikur respekton makinën në kurriz të këmbësorëve

Veliaj: Nuk është kështu. Në shumicën e rasteve ne kemi probleme të rënda me pronësinë, ku ai del aty dhe kemi pasur raste na plagosen punëtorët dhe goditen…

Për ta shtyrë gardhin 1 metër…

Veliaj: Po, për 1 metër dhe prandaj them. Jo nuk është kjo zgjidhja, por më mirë se sa ta lëmë kënetë, t’i kthehemi pastaj mureve dhe gardheve me procesin e legalizimeve, hipotekave dhe t'i marrim me radhe, ose ….

Ju mendoni një fazë të dytë për të bërë ndërhyrje…

Veliaj: Më lër të të  shpjegoj, unë e kuptoj edhe këtë. Njerëzit shikojnë në internet dhe thonë, ah pse kështu, pa trotuare? Kjo është shumë kollaj, por duhet të kuptosh që pas gjithë asaj është një dramë. Tani kemi dy mundësi, o 20mijë banorë unë  lë edhe 5 vjet sa të zgjidhet ajo, ose të bëjmë 90% të suksesshëm investimin dhe pastaj sigurisht mund të korrektojmë edhe këto. Edhe ajo që më rezulton është, kush është tiranas, ose kush ka ardhur më herët në Tiranë është shumë bujarë për atë 1 metërsh, kush e ka zaptuar, e ka legalizuar, ai është akoma më agresiv se një pronar i vjetër sepse mendon, ngaqë e zaptoi vet mendon që edhe shteti do t’ia zaptoj atij.Ndërkohë prona nëletra e atij është thjesht na lejon për një trotuar. Ju duhet të kuptoni, si të shpronësosh INSIG-un e famshëm për të hapur Unazën, si të shpronësosh 1 metër katrorë avllie, procedura zgjat 6 muaj. Nëse ankimohet 9 muaj, nëse shkon në gjykatë 12 muaj. Sa e patë që na u vonua hapja e Unazës së Vogël që prapë u hap në kohë rekord, por na u vonua 1 vit vetëm prej këtyre gjërave. Tani, imagjino të gjithë këto investime që bëhen në Tiranë, unë kam 2 mundësi ose t’i lë një vit të presin, të humbet cikli buxhetor, të ribëhet edhe njëherë gara, të apelet edhe njëherë vetëm për një mur ose të them në djall ky maskara që nuk bashkëpunon dhe nuk e gjen gjuhën e qytetarisë për të bërë pak tolerim për këtë trotuar, për këtë pllakë, tani këta janë njerëzit. Unë kam marrë përsipër të jem kryetari i Bashkisë së Tiranës jo kryepsikologu i Shqipërisë. Për sa kohë që është ky mentalitet vendimi që kam marrë është, le të bëhet 90 % e punë dhe pastaj, pyll pa derra s’ka, edhe ky pylli ynë në Tiranë i ka ca derra që nga tahmaja për te zaptuar me letrat që kanë bërë, me legalizimet sot janë kthyer në pronarë të asaj gjurme ku do të ishte trotuari. Shikoni çfarë hoqëm me Bulevardin e Ri dhe me Unazën e Re, pra për projekte madhore edhe vite të tëra të menaxhojmë këtë. Ky është edhe një moment për t’i bërë apel kush ka zemër shqiptari, kush ka mentalitet qytetari duhet të na ndihmojë. Një metër tërheqje e avllisë nuk është ndonjë dramë e madhe. Në shumicën e rasteve e gjejmë, në raste si ky cepi në Allias apo ca vende të tjera sigurisht del ai personazhi negativ i cili e djallos për gjithë të tjerët. Por prapë unë them është më mirë që 90 % e territorit ka marrë një pamje më dinjitoze dhe po t’i pyesësh në Allias, të kthehemi prapë te balta meqenëse është hapur ky muri, të gjithë thonë, lere more këtë se kemi dalë në dritë, pastaj murit kur t’i vijë radha.

 Zgjidhjen e shikoni te gjeneroziteti i njerëzve apo një ndërhyrje e dytë që do të bëni me proces shpronësimi apo duke parë legalizimet?

Veliaj: Edhe, edhe, unë jam njeri praktik. Ku gjej bujari e çmoj shumë dhe sigurohem që në shumë prej këtyre inspektimeve të futem në shtëpi dhe t’i falënderoj personalisht që na kanë dhënë një metër dhe në pjesën më të madhe kështu funksionon. Aty ku insistohet për shpronësim na duhet të bëjmë letra dhe gjithë kalvarin 1 vit nëpër gjykata, nëpër apelime për 3 m2.

 Flasim për urbanistikë dhe për rregull, Plani Urbanistik i Tiranës ku mund të gjendet?

Veliaj: Në faqen e Bashkisë së Tiranës.

Ka shumë njerëz edhe arkitektë, edhe urbanistë që nuk e gjejnë dot.

Veliaj: Në faqen e Bashkisë së Tiranës. Unë jam njeriu që i përgjigjem secilit në 1 minutë, shkoni te tirana.al dhe e keni Planin Urbanistik aty. Shkoni te tirana030.al, është faqe ekskluzive vetëm për Planin Urbanistik. Në qoftë se dikush mund të fuqet nga regjia na e konfirmon që është faqe ekskluzive vetëm për planin, tirana030.al.

3 maj 2015, në një takim me familjet në parkun “Rinia” ju keni thënë, premtimi im është që të kemi bashkë me qeverinë një moratorium të ndërtimeve, të ndërpresim ndërtimet ashtu si qeveria ka vendosur dhe të sigurohemi që fillimisht të shpëtojmë të gjithë hapësirat publike për parqe. Në 9 qershor ju keni thënë, 0 ndërtime në Tiranë. Pyetja ime është kjo, a është ndërtuar mjaftueshëm në Tiranë?

Veliaj:Unë i kam qëndruar premtimit të moratoriumit sepse Tirana ishte pa plan urbanistik dhe kam thënë, në qoftë se e ndjek bisedën, pa pas një plan nuk mund të vazhdojmë më të japim leje, pa plan.

Ju keni thënë 0 ndërtime për faktin që nuk ka pasur një plan?

Veliaj: Patjetër. Më thuaj një qytet që ka 0 ndërtime në përjetësi. Qytetet ndërtojnë, krijojnë komunitete dhe janë…

A duhet ndërtuar ende në Tiranë?

Veliaj: Unë besoj që kemi zgjidhje tjetër për 70 veta që vijnë përditë në Tiranë? Në qoftë se ju më propozoni që unë të bëhem racist dhe të vë doganë në Tiranë, ma thoni. Pyetja është, ju jeni kryetar i bashkisë, çdo ditë në Tiranë vijnë 70 veta, ku rrinë këta? Ose do të shkojë metri katrorë 3 mijë, 4 mijë euro dhe ne do të jemi një episod i “hunger games” dhe do të luftojmë qençe me njëri-tjetrin për banesë dhe për territor, ose unë do të vë doganë mos hyjnë këta në Tiranë. Pra do të bëhemi një shoqëri raciste e të njëjtit qytet që na ka mirëpritur ne të gjithëve kur kemi ardhur në Tiranë se ky një fshat ka qenë, ose sipas planit ndërtimet. Siç e thatë në rastin e Allasit, problemi i Tiranës nuk janë ndërtimet me leje, të rregullta, problemi janë ndërtimet pa leje. Ndërtime me leje sa kam ardhur unë në Bashkinë e Tiranës janë 16.

Pra ju thoni që duhet ndërtuar ende në Tiranë.

Veliaj: Për t’u ndërtuar me plan, tani që ka plan.

A duhet ndërtuar ende në kurriz të hapësirave publike?

Veliaj: Në kurriz të hapësirave publike që është pronë shtet? Jo, nuk duhet ndërtuar.

Tirana aktualisht ka 600 mijë banorë dhe 18 milionë m2 banim çka do të thotë që kryeqyteti ka ezauruar kuotën e ndërtimin 30 m2 për 1 banor. Nëse marrim rritjen e Tiranës në shifrat që ju thoni që është 2 % në vit, rritje mekanike dhe rritje natyrore, Tirana ka nevojë, shtesa do të shkonte 120 mijë – 150 mijë banorë për 15 vitet e ardhshme dhe do të kërkonin le të themi 4.5 milionë m2 për 15 vite ose e kthyer në një mënyrë më të kuptueshme do të thotë që bashkia do të jepte jo më shumë se 300 mijë m2 leje ndërtimi në vit për banime, e përkthyer në apartamente jo më shumë se 3 mijë apartamente dhe e përkthyer në pallate jo më shumë se 10 pallate në vit. Kjo është kërkesa?

Veliaj: Kjo është arsyeja pse ne po zgjerohemi nga Bulevardi i Ri i Tiranës. Bulevardi i Ri parasheh zonën, ose le të themi lagje të një Tiranë të 100 viteve të ardhshme ku do të kemi në fokus edhe të ndërtimeve që kanë shërbime publike, banka, kompani sigurimesh, zyra, ambiente pune, sigurisht edhe nj pjesë të madhe të hotelerisë. Pra jo të gjitha ndërtimet janë vetëm pallate për të banuar. Pra dy kërkesat që ne kemi dhe që na kanë ardhur nga KKT-ja për t’i menaxhuar në Bashkinë e Tiranës, të miratuara prej tyre janë kryesisht hoteleri dhe zyra, jo pallate ndërtimi. Pra kur bashkia jep leje ndërtimi nuk është ekskluzivisht vetëm për apartament. Një pjesë e madhe ka të bëjë me hotelerinë, një pjesë e madhe ka të bëjë me zyra, një pjesë e madhe ka të bëjë me kapanone dhe vende prodhimi. Kështu që në këtë sens aritmetika është e saktë por e mangët sepse janë edhe këta elementët e tjerë.

Sa planifikon të japë, leje ndërtimi, sipas planit urbanistik bashkia?

Veliaj: Ne kemi planifikuar një Tiranë që deri në 2030 është për 1.5 milionë banorë dhe jo për 4.5 milionë banorë sa ishte plani i paraardhësit tim që kishte fryrë popullsinë potenciale të Tiranës sikur këtu do të jetonte gjithë shqiptaria, gjithë Mali i Zi, Kosova, Maqedonia në Tiranë…

Kjo puna e banorëve në Tiranë duke pas në shifra si lista e votimit që ke 3.5 milionë votues dhe 2.7 milionë banorë…

Veliaj: Por në dallim nga votimi që ti potencialisht je edhe në Australi dhe vjen voton, ti rezident në pallat o e ke ose nuk e ke. Kështu që në këtë sens kjo nuk është e njëjta aritmetikë. Pra mobiliteti i lëvizjes së votës nuk është i njëjtë me mobilitetin e lëvizjes së pronës.

E kam në kuptimin e nevojave të qytetit. Censusi i fundit thotë se janë 2.7 milionë banorë në të gjithë Shqipërinë..

Veliaj: Qyteti i bën kalkulimet e nevojave në bazë të regjistrimit të rezidencës. Votimi nuk ka rëndësi ku je rezident, mjafton të jesh shtetas. Pra unë planifikoj ata që janë rezident dhe për sa kohë që lista e rezidencës po më shtohet me disa dhjetëra veta që vijnë në ditë unë duhet të planifikoj çdo vit Tiranën që rritet me 30 mijë persona.

Aritmetika është e saktë, 30 mijë persona në vit, 120 mijë – 150 mijë në 15 vitet e ardhshme. Këndi i lojërave që u bë me debate të shumta u përurua në 1 qershor 2016, treni ende nuk është vënë në punë…

Veliaj: Treni ishte në punë sot. Isha në këtë 1 qershor, biles i dhashë vetë trenit por s’ke parë kronikën atë ditë. Në 1 qershorin e këtij viti i kam dhënë vetë trenit. Duke qenë se treni është me bateri ka orare dhe fasha kur pauzon por është lajm i mirë kur çdo gjë funksionon në Tiranë dhe në një televizion kombëtar ne shqetësohemi për orarin e trenit në një nga këndet e lodrave. Do të thotë që e kemi rritur piacën e standardit.

Detyra e një kryetari bashkie është rritja e cilësisë së jetës në Tiranë për gjithë banorët.

Veliaj: Dyshoj se do të kishte një kryetar bashkie në çdo vend të Evropës që do të dinte edhe oraret e trenit. Por fakti që kemi mbërritur në këto detaje do të thotë që Tirana i ka punët mirë.

Parkimet në hapësirat publike deri në orën 20:00 tarifohen nga Bashkia e Tiranës. Pas orës 20 dalin disa persona me arka dhe të dëmtojnë edhe makinat…

Veliaj: Ai është problemi. Jam duke folur me të dy kolegët e policisë së rendit dhe të qarkullimit, Policisë së Shtetit, edhe me zotin Veliu edhe me Erjon Ahmetin e qarkullimit. Ky është një problem. Pra ne zgjedhim një politikë sociale, pra kur njerëzit janë pas orarit të punës dhe prapë na, së pari nëse ka një të mirë kjo problematikë është se konfirmon atë që thoshim ne që gjatë paradites po kështu abuzohet. Më mirë që këto para i mere shteti dhe bashkia dhe bën investime publike sesa këta spekulantë. Tani këta spekulantë janë reduktuar vetëm në 2-3 orët e fundit të natës. Do të gjejmë një mënyrë, një pjesë e madhe e tyre janë minorenë që kanë një tutor që që u thonë, gërvishtja makinën po s’të dha xhaxhi lekë. Kështu që është një prej problematikave të shumta që ka qyteti që s’mbarojnë.

Raporti i fundit i Agjencisë Kombëtare të Mjedisit e nxjerr Tiranën qyteti që ka ndotjen më të lartë dhe zhurmën më të lartë, një zhurmë mbi normën e lejuar të OBSH-së.

Veliaj: Në Shqipëri?

Në Shqipëri.

Veliaj: Po në Francë kush është qyteti me ndotjen dhe me zhurmën më të madhe?

Harta e zhurmave, duket si një llavë e nxehtë e lëshuar mbi qytet, ngjyra e kuqe janë niveli mbi normën e lejuar nga OBSH.

Veliaj: Të sqarojmë disa gjëra. Për definicion qyteti më i madh i çdo vendi në botë është qyteti me më shumë zhurmë dhe me më shumë ndotje.

Kjo është e vetëkuptueshme, është si të themi sot është ditë e premte.

Veliaj: Po këtë thatë. Thatë raporti iu nxori më të zhurmshmit dhe më të ndoturit në Shqipëri.

Mbi normën e lejuar, nuk po themi qetësi varrezash…

Veliaj: Për definicion më i zhurmshmi dhe më i ndoturi prej makinave, prej lëvizshmërisë, del gjithmonë kryeqyteti.

Por jo mbi nivelin e lejuar nga OBSH-ja.

Veliaj: Ti mendon se unë do shpëtoj nga kjo studio pa iu përgjigjur asaj. Patjetër, por më lerë ta përdor këtë edhe si një mënyrë për të kërkuar pak emancipim. Pra për sa kohë që njerëzit do të jetojnë në Tiranë duhet të pranojnë që në Tiranë janë të sigurta taksat dhe është i sigurt trafiku.

Edhe rritja e çmimit…

Veliaj: Patjetër taksat, por është më mirë të jetë e sigurt pagesa sesa vjedhja se deri dje në Tiranë ishe e sigurt vjedhja, rënia e nivelit të pronës, rënia e cilësisë së jetës. Sot janë të sigurta taksat dhe trafiku. Po erdhe në një qytet që tashmë i ka 190 mijë makina, kanë qenë 170 mijë kur fillova punën, tani janë 190 mijë. Po erdhe në një qytet me 190 mijë makina ku të gjithë duan të dalin në orën 8 do të pranosh se si ty kanë bërë edhe ata zgjedhjen të dalin. Pra kush të jep të drejtën ty të diskriminosh të tjerët që janë në trafik, të thuash ka shumë trafik kur ti në fakt je vetë trafik, je vetë trafik, je vetë kontribuues. Pra për këtë duhet ta qetësojmë vetë mendjen. Kush do të mos ketë trafik, në Has nuk ka trafik, në Këlcyrë nuk ka trafik, në Përmet nuk ka trafik, edhe në Fishtë nuk ka trafik.

Po, por juve iu pyesim për qytetin që të ketë sa më shumë njerëz…

Veliaj: Më lini t’i shpjegoj, t’i marr me radhë. Ajo që kam thënë edhe herë të tjera…

Thoni që Tirana është qytet për t’u vizituar, kërkoni turistë të huaj…

Veliaj: Patjetër se prodhon ekonomi…

Tani po flasim…

Veliaj: Tani po pushoj që ti të mbarosh, por kur ti të mbarosh unë do përgjigjem.

Ju keni instrumente që mund të ndërhyni, ju si bashki keni instrumente për të kufizuar nivelin e lartë të zhurmës. Nuk po themi ta vëmë këtë qytet në gjumë por keni instrumente për të ndërhyrë.

Veliaj: Tani do të përgjigjem unë, por ju do më dëgjoni. Inspektorati i Ndotjes Mjedisore është inspektorat i qeverisë qendrore. Te ndotja mjedisore futet ndotja akustike, ndotja e gazrave dhe tymrave që bëjnë gjithë qoftet dhe byrektoret, furrat e bukës edhe gjithë restorantet. Është inspektorat i qeverisë qendrore. Ka qenë kërkesa ime që kur filloi procesi i decentralizimit që t’i kalojë bashkisë. Kam marrë një premtim nga Edi Rama dhe fati im që ai e njeh bashkinë se ka qenë kryetar bashkie dhe e pranon që ky është një nonsens. Duke qenë se tanin me këtë qeveri nuk i kemi më këto komplikacione, e ka kjo parti e ka ajo parti, tani nuk ka asnjë arsye që kjo të mos ndodhë. Premtimi i kryeministrit është që këtë kompetencë për zhurmat, lokalet, ndotjet, zgarat, qoftet duhet t’ia kalojmë bashkisë. Edhe mua si ty më duket revoltuese, por kështu është. Edhe një qytetar se kupton në fillim por kur shikon ligjin thotë, ore paska të drejtë kryetari që nuk e paska bashkia dhe më kat që nuk e ka se duhet ta ketë bashkia. Kështu që në shtator besoj se do të jetë një nga kompetencat që do t’i kalojë pushtetit vendor. Kur vjen puna te llojet e zhurmave në Tiranë kemi një problem shumë të madh, një pjesë e madhe janë zhurma borie që i shkaktojmë vetë. Pra ne kemi një sjellje nevrastenike në trafik kur një zonjë mos niset menjëherë sa ndizet jeshilja, 20 burra i ndezin borinë a thua se kanë ndonjë ngut të shkojnë diku kur do të shkojnë te kafja tjetër. Pra një pjesë të madhe të rrugës ne e shkaktojmë vetë. Ulërasim me zë të lartë, bërtasim në rrugë, i biem borisë. Kjo është pjesë civilizimi. Duhet të na ndihmoni, nuk është vetëm monopoli im. Ju thatë kemi mjete, por edhe ju keni mjete, jeni televizion publik, bëni pak sensibilizim që njerëzit të mos i bien borisë. Në këtë sens ajo që ne themi, unë jam optimist nga natyra por optimist bazuar në fakte. Le të themi edhe lajmin e mirë, po situata nuk është ideale po e patë nga viti 2014, 2015, 2016 ne jemi në përmirësim.

Është aq e vogël sa nuk ka vesh që ta kapë këtë ndryshim, vetëm aparaturat e kanë kapur…

Veliaj: Nëse e nxjerr postimin flasim për 10 ppm, pra nga 66 në 54 me 12-13 pikë në fakt është 1/5 rënie. Nuk është pak.

Mbi normën e lejuar…

Veliaj: 45 pmp është i lejuari…

50 është i lejuari…

Veliaj: Domethënë qenkemi akoma më afër. Pra në qoftë se ne biem edhe 5 mikron atëherë qenkemi shumë afër nivelit të lejuar.

Është 64-48 ditën, 51-49 natën, ka nivel zhurmash edhe natën.

Veliaj: Më thuaj që jeni gati të mos përdorim makinat edhe unë i ndaloj edhe makinat e qytetit, por më rezulton që kjo është një sakrificë që askush nuk është gati ta bëjë këtë moment. Kemi filluar me kufizim, e filluam njëherë si dita pa makina, pastaj e kthyem gjithë sheshin pedonal aty ku bëhej dita pa makina që është sheshi “Skënderbej”. Jam i bindur vitin tjetër do të kemi rezultate akoma më të mira. Por duhet të kuptojmë një gjë, Bashkia e Tiranës nuk ka as furra buke, as fabrika, as flotë me makina. Shumica e bashkisë vjen me biçikletë ose me autobus, pra në këtë sens këtë ndotje nuk e shkakton një fuqi e huaj apo autoriteti që duhet ta pastrojë.

Për çfarë e kisha fjalën kur thosha që ndryshimi është kaq pak i dukshëm saqë e kapin vetëm aparaturat. Zona e Tiranës për natën 57.27 në 2014, 57.82 me rritje në 2015 dhe 56.21 në 2016. Domethënë është një ndryshim kaq i vogël në përmirësim saqë është kret i pandjeshëm. Ky është niveli i zhurmës natën në qytet…

Veliaj: Këtë po them unë, unë nuk e kam fare kompetencë, sapo ta shpjegova këtë se u ktheve te zhurma. Unë po iu referohesha mikronëve të ajrit që vjen nga ndotja që prodhojnë marmitat e makinës. Është matja e benzenit në ajër që del nga djegia kurse kjo e zhurmave çudi që nuk është rritur sepse sa është rritur Tirana duhet të ishte bërë më shumë zhurmë. Fat që paska ngel aty aty, por të garantoj kthejani bashkisë kompetencat dhe unë do të bëj një punë më të mirë siç përgjithësisht kanë bërë bashkitë me kompetencat që kanë marrë nga qeveria qendrore. Shikoni nivelin e kanalizimeve të tokave bujqësore që kur kryeministri pati vizionit t’ia kalonte bashkive, sot ke shumë më shumë kanale vaditëse dhe kulluese në funksion seç kishte kur menaxhoheshin në mënyrë të qendërzuar nga Ministria e Bujqësisë.

Ç’mund të thoni për numrin e automjeteve. Tirana është i vetmi qytet në Shqipëri që nuk ka by-pas ende. Domethënë çdo makinë që vjen nga perëndimi, nga veriu, nga verilindja për të shkuar në jug do të duhet patjetër të kalojë në bulevard dhe projekti i Unazës së Madhe ose pjesë e Unazës së Madhe sipas ARrSh-së, segmenti nga Shkolla Teknologjike te Komuna e Parisit me lote, i pari përfundon në korrik të këtij viti dhe i dyti në shkurt të 2018-s. Që do të thotë vetëm në shkurt të 2018-ës do të mundet të bëhet i mundur një pjesë e këtij by-pas.

Veliaj: Do të bëhet i mundur në verë kalimi nga Shkolla Teknologjike drejt Lundrës dhe pastaj pjesa tjetër është pjesa Lundër, zona e Farkës deri pranë zonës së Dajtit.

Ajo është një histori tjetër është projekt fond..

Veliaj: Është i qeverisë qëndrore

Po flasim për segmentin që sapo përmendët. Sipas Agjencisë Rrugore thuhet se mbaron shkurt të 2018-tës

Veliaj: Ky segment do të hapet në verë, Ky segment do të hapet në verë, segmenti i Shkollës Tenologjike

Një prej elementëve, aksioni që keni nisur më  19 prill 2017  ka qenë “Open dataTirana.al”. Në këtë Open Data nuk e gjeta planin urbanistik që kërkova.

Veliaj: Është TR030.com ose.al

Më bëri përshtypje që ka të dhëna të përgjithshme edhe për projekte strategjike, por nuk ka një hartë që të tregojë konkretisht si ndryshon një shesh ose një rrugë?

Veliaj: Hartë- fotografi po thua, s’e kuptoj?

Hartë-projekt

Veliaj: Domethënë, ke një projekt specifik që ke në mendje…Pra ajo jep statistikat e gjërave që ndodhin, pra në qoftë se ke nevojë për harta të një niveli ekspertize, ato i merr pastaj nga urbanistika, por s’kuptoj ekzaktësisht çfarë kërkon që nuk e gjen në ëebsite.

Ka të dhëna shumë të përgjithshme. Ta zëmë, “Open Data” para disa ditësh publikoi një tender me 100 milionë lekë për shërbimin e pastrimit të zonës 2, 3 dhe 4. Këto të dhëna nuk i gjen në portalin e transparencës së Bashkisë.

Veliaj: Sepse janë në portalin e APP, aty ku bëhet gara. Gara nuk bëhet në Bashki, bëhet në Agjencinë e Prokurimeve Publike, pra në Agjensinë e Prokurimeve Publike janë të gjitha dokumentat e tenderit dhe arsyeja pse bëhet në atë portal është sepse aplikimi është elektronik.

Është një shprehje që ju e pëlqeni ose e keni cituar shpesh ose jeni përpjekur ta shqipëroni, “economy stupid” shprehja e famshme. Çfarë mendoni të planifikoni nga pikëpamja ekonomike dhe sociale për kryeqytetin, ose le të themi cili është plani më i rëndësishëm që ju keni?

Veliaj: Për pjesën ekonomike, ne jemi duke planifikuar aplikimin pranë qeverisë për një zonë të lirë ekonomike në zonën e Kasharit, shumë pranë impiantit të përpunimit. Aty kemi një terren që mund të adoptohej fare mirë në një zonë të lirë ekonomike, si zona që po bëhet në Durrës po jo me privat, por ta bëjë Bashkia. Ne kemi shumë të huaj që kërkojnë kapanone dhe përgjithësisht futen tek këto historitë e atij murit në Allias, prona ime prona jote, dhe atyre u del buza që të gjejnë një hapësirë, një tokë të bëjnë një kapanon, sepse fillojnë e zihen me lloj-lloj njerëzish që i shohin si ndonjë mundësi për t’i zhvatur. Tani, për të shmangur këtë lloj tensioni mes investitorëve dhe disa njerëzve në Shqipëri që mendojnë se u ka rënë “bingo” dhe tokën do e shesin sa frëngu pulën, duke larguar investitorin, ne kemi thënë, marrim një territor..

Kanë idenë që poshtë asaj toke ka naftë?

Veliaj: Patjetër, naftë, flori, çfarë të duash, megjithatë kjo është pjesë e mentalitetit. Kësaj s’kemi ç’i bëjmë, por që ajo që mund të lehtësojmë është që të marrim një hapësirë disa hektarëshe në menaxhim të Bashkisë, ne të vendosim aty infrastrukturën bazë që do të thotë, ujë, kanlizime,fibrat, interneti, energjia, që kompania menjëherë të ngrejë panelet sandëich dhe të fillojë për punë ditësh punën dhe për të lehtësuar gjithë këtë ndërmjetësim të çështjeve të imobiliares. Kjo është një nga idetë, pastaj të gjitha idetë tona deri më sot kanë pasur një efekt ekonomik. Pazari i Ri, punonin 20 veta në zgëqet që kishin mbetur në atë kohë, sot punojnë 1007, 1008 veta. Sot vetëm në shoqatën e bizneseve të Pazarit të Ri janë 300 biznese që paguajnë kuotë. Në këtë sens, shumë prej investimeve kanë një karakter ekonomik. Sheshi “Skënderbej” punon pa fund njerëz. Vetëm në parkingje, vetëm në pastrim, në higjienizim, kopshtar. Parkingu vetë ka një koncept ekonomik, pra është i vetmi shesh që po paguan veten, për mirëmbajtjen dhe aktivitetetkulturore.

Përmendët, sheshin “Skënderbej”, bulevardin, Pazarin e Ri, është një qytet që ka lypsa në rrugë e sidomos në këto ambiente. Si do i ndihmojë Bashkia këta njerëz?

Veliaj: Ne kemi hapur 4 menca sociale për momentin, ushqejmë çdo ditë 350 vetë. 4 të tjera pastaj i kemi hapur në bashkëpunim me shoqërinë civile, pra me OJF, jo me këta që rrinë tërë ditën në facebook, por me OJF të mirëfillta që punojnë në terren, por një pjesë e madhe është çështje sociale, një pjesë tjetër është çështje kriminale. Pra, kur dikush i përdor fëmijët si automat, bankomat dhe i çon nëpër rrugë me makina, atyre pastaj është një shkelje e një niveli tjetër. Sigurisht për ne është shumë e vështirë të kërkojmë heqjen e prindërimit nga prindër të papërgjegjshëm të tillë, që i heqin fëmijët nga shkolla për të bërë këto punë, ndërkohë që vetë janë tek lokali përballë, duke numëruar kalimtarët që dhuruan. Është diçka që ne po e bëjmë me skuadra mobile të shërbimeve tona sociale. Unë sapo kthehem nga Neë York. Blomberg po thoshte tjetër gjë, çdo cep të Neë York-ut ke nga një lypës, pra nuk është diçka që zgjidhet me dhunë dhe me polici, ashtu si edhe çështja e ambulantëve. Ne kemi tregje që rrinë bosh, ndërkohë që ka shumë njerëz që insistojnë të shesin vetëm në rrugë, ka edhe banorë që vazhdojnë të blejnë në rrugë, ndërkohë aty është hyrja e dikujt që do të hyjë në banesën e vetë dhe do ta ketë të pastër hyrjen në banesën e vet. Pra, ne na duhet të pranojmë një gjë! Dakord, e duam Tiranën si jashtë shtetit, por e duam si jashtë shtetit si Kalkuta, apo e duam si qytet europian. Kryetari i Bashkisë së Firences dogji 70 mijë sende të konfiskuara që shiteshin në rrugë nga ambulantët çanta, syze, ushqime. Bëri në Firence një dëm të madh, pra…

Nuk është shembull i mirë për tu marrë.

Veliaj: Jo jo, po them po them janë problem…Jo, në fakt mund të jetë shembull shumë i mirë, se njerëzit më shumë duan të shkojnë në Firence se në Tiranë dhe ai detyrohet të tregohet agresiv se thotë, nuk mund ta degjeneroj qytetin, ku të gjithë shtrihemi në rrugë për të shitur dhe për të blerë gjithçka, sepse realisht degjeneron qyteti nga bllokimi i hapësirës ku ecin njerëzit dhe nga ky shkëmbim ku ne kemi bërë tregje që janë sot shumë dinjitoze, siç është Pazari i Ri. Kjo është një punë graduale, nuk bëhet kjo as me dorë të forte. Kjo kërkon edhe një pjekje të emancipimit, se kur shikon njerëz që blejnë me bidona në rrugë qumësht, them: Sa kurseve? Kurseve 100 lek? Po të ishte qumështi i mirë ashtu, hajde i vëmë të gjithë gojën sisës së lopës dhe ta pimë direkt nga lopa, me gjithë bakteret dhe me gjithë sëmundjet. Pra, ka një logjikë pse qumështi pasterizohet.Kjo është një pjesë rregullash të bashkisë, që siç e keni vënë re, unë nuk hezitoj t’i përforcoj por kjo është edhe një pjesë mentaliteti dhe do të duhet të takohemi diku në mes, do të duhet që edhe publiku të fillojë të civilizohet, të kuptojë që blerja në rrugë, buzë kanaleve të ujërave të zeza, buzë pusetave, me qumësht që sa ka dalë nga lopa nuk është kjo mënyrë për të kursyer, se të shkon më shumë ilaçe gjithë kjo histori.

Sa po ju ndihmon ju përvoja si aktivist, si ministër, si deputet për një kohë të shkurtër për të menaxhuar kryeqytetin?

Veliaj: Nuk besoj se ka një manual, si të bëhesh kryetar bashkie. Kjo është një nga ato lloj punësh që e mëson si notin, të hedhin në det dhe aty fillon lëviz gjymtyrët, kështu që dua të them që kam akoma kuriozitetin e ditës së parë dhe gjithmonë jam duke mësuar nga kjo punë dhe nuk besoj që kalon një ditë që s’mësoj një gjë që nuk e dija një ditë më parë.

Sa pret që t’ju ndihmojnë qytetarët për të realizuar ëndrrën tënde, për një cilësi më të mirë jete në Tiranë?

Veliaj: Unë patjetër që kam sfida por në një farë mënyre jam bekuar nga qytetarët më inkurajues dhe më mbështetës që mund të ketë ndonjëherë ndonjë kryetar bashkie, pranë. A ka një 10% që bën pis, që ndot akoma, që vandalizon, që prish, që pështyn në tokë, që bën grafiti, që nuk respekton hapësirën publike, që ende mund të vazhdojë të urinojë poshtë Lanës?! Po patjetër, patjetër por krahasuar me shumicën e njerëzve që duan rregull, që duan pastërti, që duan higjienë, që duan discipline, as nuk krahasohet. Shumica e njerëzve në këtë qytet, pavarësisht që mund të mos kenë votuar fare, që i takoj përditë dhe thonë: Ore unë jam me Saliun dhe Lulin për politikë të madhe, por hallall, sepse duhet të ketë rregull dhe nuk mund të bëjmë rrumpallë. Kështu që në këtë sens…

Kam një pyetje të fundit, kemi shumë pak sekonda në dispozicion

Veliaj: …Në këtë sens kam shumë inkurajim nga njerëzit edhe besoj është “karburanti” që më mban akoma.

Ju i takoni qytetarët në takimet të rregullta apo periodike që keni. Një rast inspirimi që ju ka bërë shumë përshtypje dhe që ju ka ndihmuar në trajtimin e qytetit!?

Veliaj: Një rast inspirimi ndodhi përpara pak ditësh, me z.Thanas të cilin e kisha njohur kur isha ministër dhe zhbllokova pagesat për personat e përndjekur, ish-të përndjekurit politikë, pagesa që për mendimin tim dhe për logjikën tonë siç e kthyem edhe në ligj  duhet t’u jepeshin si prioritet atyre që janë gjallë, që të kishin shumën e tyre dhe pastaj nipit dhe stërnipit edhe stërmbesës. Të jem shumë i sinqertë, si nipi i një dëshmori, si nipi i një të ish-përndjekuri nuk kanë as meritë, nuk kanë as faj për aktet heroike të gjyshërve apo stërgjyshërve! Do të thotë që në këtë sens, të përfitojnë njëherë ata që janë gjallë dhe e kanë pasur në kurriz këtë vuajtje, këtë plagë dhe pastaj nipat,stërnipat, mbesat se paratë një ditë do jepen sipas ligjit! Besoj se bëmë vendimin e duhur dhe inspirimi ishte tek ky person që mori 7 milionë lekë dhe me ato…Më preku jashtë mase dhe kur i vizitova në shtëpi, i kishte thënë të shoqes, lër 2 milion menjëanë për shpenzimet e varrimit dhe të mos iki me borxhe nga kjo, u thuaj dhe të afërmve, ja ku janë, që ne mos t’i kemi dhe me të tjerat bëri fasadën e..

Nuk dyshoja që do e përmendit këtë rast dhe që të tjerët nuk e trajtuan edhe aq mire, që paratë që mori si dëmshpërblim bëri fasadën e pallatit..

Veliaj: Po, bëri fasadën e pallatit dhe më frymëzoi jashtë mase.

Ky do të ishte qytetar ideal dhe qytetar nderi për Tiranën

Veliaj: Dhe e nderuam me medaljen e simbolit të qytetit, pikërisht për këtë akt sepse ishim edhe në kohën kur flisnim për administratorët dhe për të treguar që ja çfarë duku mund të ketë me pak bon sens, pak bujari nga secili.

Intervista e marrë nga web www.rtsh.al. Më poshtë linku:

https://rtsh.al/lajme/kryebashkiaku-veliaj-perballe-dervishit-ne-rtsh/