Pezullohen 7 efektivë të grupit “Shqiponja”, ndaluan kunatin e ministrit Tahiri

Drejtori i Policisë së Tiranës, Ervin Hodaj ka pezulluar për tri ditë, 7 efektive të forcave “Shqiponja”, pasi kishin ndaluar kunatin e ministrit të Brendshëm, Saimir Tahiri. Balkanweb raporton se  ngjarja ka ndodhur rreth 10 ditë më parë në unazën e kryeqytetit pranë banesës së këtij të fundit, ku ai ushtron edhe një biznes privat bar kafe. Ditën e ngjarjes, forcat “Shqiponja” kishin marrë informacion se pikërisht në këtë lokal gjendej një person i armatosur, prandaj ata morën masa duke shkuar pranë lokalit, por pa ndërhyrë në të. Por prania e shtuar e forcave policore përballë biznesit e ka shqetësuar kunatin e ministrit dhe ai ka kërkuar të dijë pse policia ndodhej aty. Kur ka marrë përgjigje negative, ai ka nisur të debatojë me efektivët. Efektivët nuk e kanë ditur se gjendeshin përballë kunatit të ministrit, i cili mësohet të ketë qenë nën efektin e alkolit dhe e kanë prangosur atë. Gjatë kësaj kohe në atë zonë kaloi eskorta e ministrit Tahiri, ku së bashku me të ishte dhe një anëtar i kabinetit i cili sqaroi situatën raporton Balkanweb.