Luftë online Kinë-Perëndim: Aristoteli nuk ka ekzistuar

Aristoteli bëhet viktima e fundit në luftën e narrativave të Kinës me Perëndimin. Studiuesi Jin Canrong vë në dyshim ekzistencën e filozofit grek, me pretendimin se trashëgimia e greqishtes së lashtë nuk mbështetet nga të dhënat e shkruara.

Jin nuk është historian. Ai është ekspert i njohur i marrëdhënieve Kinë-SHBA në Universitetin Renmin në Pekin dhe këshilltar i qeverisë kineze.

Për më tepër, ai është influencues në Douyin, versioni kinez i "TikTok", ku një videoklip i fjalimit të tij mbi Aristotelin u bë viral muajin e kaluar, duke gjeneruar një debat publik të jashtëzakonshëm mbi besueshmërinë e historisë perëndimore.

Jin pretendon se nuk ka asnjë të dhënë të shkruar para shekullit të 13-të që mund të vërtetojë ekzistencën e Aristotelit, dhe filozofi i lashtë, nëse ai ekzistonte më shumë se 2000 vjet më parë, nuk mund të kishte shkruar qindra libra që përmbajnë miliona fjalë përpara mbërritjes së letrës në Evropë, në shekullin e 11-të.

“Aristoteli doli nga hiçi dhe ajo që e bëri më të dyshimtë ishte se ai duket se ka një trupë gjithëpërfshirëse njohurish, duke filluar nga optika dhe etika, deri te ekonomia dhe politika,” thotë ai në video.

E rëndësishmja në këtë qasje nuk është përmbajtja, por objektivi. Studiuesi në fjalë u drejtohet "përdoruesve të rrjeteve sociale", audiencë kjo krejt ndryshe nga të tjerat, pa filtra, pa kritikë, por vetëm një mjedis ku ndikohen tufa milionëshe dëgjuesish. Dhe kjo e bën atë politike, shumë politike.