1 milion të papunë?

Para zgjedhjeve të 23 qershorit, Edi Rama përsëriste vazhdimisht se numri real i të papunëve në Shqipëri ishte 1 milion, ndërkohë që Berisha (duke iu referuar INSTAT-it) këmbëngulte se numri i të papunëve ishte vetëm 0.14 milion.

Në buletinin e djeshëm të INSTAT-it (aktualisht INSTAT-i drejtohet nga Gjergj Filipi, i emëruar nga qeveria Rama), thuhej se forca e punës në fund të 2013-ës ishte 1.175.919 persona, dhe shkalla e papunësisë ishtë 15,6%. Pra, i bie që të papunë kanë qenë 0.18 milion, e jo 1 milion, sa ç’pretendohej para 23 qershorit nga Rama.

Në një intervistë dhënë para disa muajsh në “Top Channel”-it, Fahrad Mehrani, konsulent i INSTAT-it, tha se: “Standardet ndërkombëtare mbi punësimin dhe papunësinë kanë ndryshuar në tetor të vitit të kaluar, pas 31 vjetësh. Kështu që është natyrale që INSTAT-i, i cili do të ndjekë standardet ndërkombëtare, të adoptojë më të fundit. Norma e papunësisë, bazuar në metodën e vjetër, ishte rreth 13%. Me standardet e reja, papunësia në Shqipëri do të llogaritej në nivelin 21%.”

Më tej, Mehrani sqaroi se: “Arsyeja kryesore lidhet me trajtimin e personave që punojnë për të siguruar jetesën, veçanërisht në bujqësi. Këta janë fermerë që prodhojnë kryesisht për veten e tyre, jo për të shitur. Në Shqipëri janë rreth 300 mijë të tillë. Deri tani këta quheshin si të punësuar. Por, me standardin e ri kjo kategori nuk do të konsiderohet si e punësuar. Ajo pjesë e tyre që bën presion në treg, duke kërkuar punë, do të regjistrohen si të papunë dhe janë rreth 40 mijë të tillë.”

Duke përdorur 21-përqindëshin e Mehranit, dhe shifrën e forcave të punës në fund të 2013-ës (1.175.919 persona), i bie që shifra e rillogaritur e të papunëve duhet të jetë rreth 0.24 milion. Por kjo shifër është përsëri shumë larg 1-milionëshit të pretenduar nga Rama, kur ishte në opozitë...

Në intervistën e tij, Mehrani shkoi edhe më tej. “Paralelisht, janë edhe të punësuarit me pak orë që duan të punojnë më shumë. Gjithashtu është edhe kategoria e të dekurajuarve. Në standardet e reja, këto përkufizime janë qartësuar dhe po ashtu edhe mënyra se si llogariten. Nëse i shtojmë dhe këto dy kategori në shifrën e papunësisë në Shqipëri, ajo shkon 40%. Pra, totali i njerëzve që janë ose të papunë, ose të nënpunësuar, ose të dekurajuar, është rreth 40%”, - deklaroi ai.

Sipas faqes së internetit të CIA-s, kjo shifër vlerësohet të jetë 30% (https://www.cia.gov/library/publications/the-world-factbook/...), por le ta quajmë të mirëqenë shifrën e Mehranit.

Meqë ai nuk sqaroi se sa janë të punësuarit me pak orë që duan të punojnë më shumë (të nënpunësuarit) dhe sa janë të dekurajuarit, po abstragojmë se numri i tyre është i barabartë. Bazuar në këtë abstragim, arrijmë në shifrën ekstreme të 0.47 milion të papunëve. Prapë, shumë larg 1-milionëshit të pretenduar nga Rama, kur ishte në opozitë...

Kjo mospërputhje e akuzave që bëjnë partitë kur janë në opozitë, me shifrat që gjejnë kur vijnë në pushtet, është sëmundje e kahershme e tranzicionit 23-vjeçar shqiptar. Dhe shembulli i mësipërm duhet të shërbejë edhe si mësim për opozitën aktuale, që të mos bëjë akuza në ajër. Sepse nesër mund të vijë përsëri në pushtet dhe do t’i duhet të ballafaqojë akuzat e sotme me shifrat që do të gjejë kur të ketë drejtimin e vendit...