BRICS zgjerohet, Tajlanda aplikon për anëtarësim

Tajlanda do t’i bashkohet bllokut ekonomik BRICS. Lajmin e bëri të ditur vetë qeveria e vendit të Azisë Juglindore.

Kabineti në Bangkok ka miratuar tekstin e letrës zyrtare që shpreh qëllimin e Tajlandës për t'u bashkuar me grupin, tha zëdhënësi i qeverisë Chai Wacharonke në një deklaratë të cituar nga mediat lokale.

Në letër vlerësohet rëndësia e multipolaritetit dhe rolit në rritje të vendeve në zhvillim në çështjet ndërkombëtare.

“Vizioni i Tajlandës për të ardhmen është në përputhje me parimet e BRICS. Vendi do të përfitojë nga ky bashkim në shumë mënyra, duke përfshirë rritjen e rolit të tij në arenën ndërkombëtare dhe ofrimin e mundësive për të marrë pjesë në formimin e një rendi të ri botëror”, thuhet në letër.

BRICS ka ftuar vendet joanëtare që aspirojnë të bashkohen për të marrë pjesë në samitin e grupit, të planifikuar për në fund të tetorit në Kazan, Rusi.

Fillimisht i përbërë nga Brazili, Rusia, India, Kina dhe Afrika e Jugut, BRICS u zgjerua këtë vit me Egjiptin, Etiopinë, Iranin dhe Emiratet e Bashkuara Arabe. 15 vende të tjera kanë sinjalizuar interes për pranim, duke përfshirë Bahreinin, Bjellorusinë, Kubën, Kazakistanin, Pakistanin, Senegalin dhe Venezuelën.

BRICS i zgjeruar përbën rreth 30% të ekonomisë globale dhe një popullsi prej rreth 3.5 miliardë banorësh, ose 45% të totalit botëror. Grupi ka mbi 40% të prodhimit të naftës në botë.

Sipas Fondit Monetar Ndërkombëtar, BRICS aktualisht përbën deri në 36% të PBB-së globale për sa i përket barazisë së fuqisë blerëse (PPP), krahasuar me pak më shumë se 30% për G7. BRICS synon të kapërcejë G7 në PBB-në nominale globale gjatë katër viteve të ardhshme, tha në shkurt kryetarja e Bankës së Re për Zhvillim (NDB), Dilma Rousseff.