Vërejtja e Rexhep Qoses: Reformat e Ramës më të shpejta se revolucionet

Akademiku kosovar Rexhep Qosja, në një intervistë për gazetën “Dita” flet për vlerësimin që do i jepte qeverisjes së majtë: “Me ndryshimet e sendërtuara në politikën shtetërore, koalicioni i majtë, shikuar në përgjithësi, ishte kryesisht i suksesshëm”, shprehet Qosja. “Opozita po i qet në shpinë Edi Ramës, plot vagona me plot gënjeshtra. E kuptueshme. Intelektualët me mendje sipërore si Edi Rama dhe Rexhep Meidani në politikën ballkanike pashmangshëm ngarkohen me gurë e kusur”. Gjithsesi Qosja thotë se reformat e Ramës janë pak të shpejta nga “ç’mund të përligjë njëmendësia e Shqipërisë”. “Më duket se ai ka harruar një të vërtetë historike: as revolucionet nuk bëhen shpejt”. I pyetur nëse Sali Berisha do ndëshkohet ndonjëherë, për ato që Qosja i quan krime ekonomike, politike dhe kombëtare, ai thotë: “Nuk besoj se do të ndëshkohet ndonjëherë”. Sipas tij, vetë qeverisja e Metës dhe Ramës nuk po e lejon diçka të tillë.