Forcat ruse tërhiqen nga Karabaku, Azerbajxhani merr kontrollin

Forcat ruse po tërhiqen nga rajoni i Karabakut në Azerbajxhan, ku kanë qenë të vendosur si paqeruajtës që nga përfundimi i një lufte në vitin 2020. Lajmin e konfirmuan zyrtarë të të dy vendeve.

Hikmet Hajiyev, kreu i politikës së jashtme në administratën presidenciale të Azerbajxhanit, konfirmoi tërheqjen, duke shtuar se ky ishte vullneti i të dy palëve. Hajiyev nuk tha pse po tërhiqen forcat, por prania e tyre duket e tepërt pasi Azerbajxhani rifitoi kontrollin e plotë të rajonit vitin e kaluar.

Rajoni i Karabakut ka qenë nën kontrollin e armenëve etnikë deri në luftën e vitit 2020 që rezultoi në rimarrjen e kontrollit të pjesëve të rajonit nga Azerbajxhani.

Lufta përfundoi me një armëpushim të ndërmjetësuar nga Rusia që kërkonte vendosjen e rreth 2 000 trupave paqeruajtëse në pjesët e Karabakut që ende mbahen nga armenët. Forcat kanë siguruar kalimin e lirë në rrugën e vetme që lidh Karabakun me Armeninë.

Por Azerbajxhani nisi ta bllokonte rrugën në fund të vitit 2022, duke pretenduar se armenët po e përdornin atë për të dërguar armë dhe për të kontrabanduar minerale.

Pas muajsh mungesa gjithnjë e më të mëdha ushqimore dhe ilaçesh në Karabakh për shkak të bllokadës, Azerbajxhani nisi një aksion blic në shtator 2023 që i detyroi autoritetet armene të Karabakut të kapitullonin pas një dite në negociata të ndërmjetësuara nga forcat ruse.

Pothuajse të gjithë 50 000 banorët armenë etnikë të Karabakut u larguan nga rajoni brenda disa ditësh.