Ka ndodhur thjesht një vetëvrasje?! Si ta raportojmë ngjarjen e Shkodrës?

Dhuna, shkak i vetëvrasjes. – TV Klan.

Alma Arrazi u vetëmbyt bashkë me 3 fëmijët – Report Tv.

Pastaj vazhdojnë gjithfarë soj grash e grarizmash që flasin për vetëflijim, për depresion, për lotë e për të tjera lodra vetëmanipuluese që po dëmtojnë një diskutim të shëndetshëm për pozitën e femrës në shoqërinë tonë.

Kemi gazetare që kapin kolltukun e studios me bythë e nuk e lëshojnë pa bërë hallën, tezen, gjyshen, gruan, mbesën, nënën, prapë gruan, gazetaren, analisten, fat-thënësen, moralisten e gjithçka të jetë e mundshme, vetëm e vetëm për të vënë në dukje sesa e zezë është gjendja e femrës në këtë vend.

Dakord, le të jetë edhe kështu. Le ta pranojmë. Në një vend ku edhe moti është opinion, le të jetë edhe kjo opinion.

Por në rastin konkret – përtej fatkeqësisë tragjike – ka një problem me raportimin. E para nuk kemi të bëjmë thjesht me një VETËVRASJE, por me një vetëvrasje të paraprirë nga Vrasja. Çfarë emri t’i vëmë ne, si ta raportojmë vdekjen e tre fëmijëve?

Edhe fëmijët u vetëvranë? Për shkak të dhunës dhe çdo hamendësimi që bëjnë këto gazo-gratë e studiove? T’i vëmë gjërave emrin që kanë dhe të themi se brenda një tragjedie të paimagjinueshme, zonja që vra u veten kreu një akt të patolerueshëm, me asnjë lloj të drejte natyrore apo shoqërore, kur mori tre fëmijët e i hodhi në lumë. Gjithnjë nëse versioni mbetet ky që kemi.

Nuk ka ndodhur vetëm një vetëvrasje. Ka ndodhur diçka shumë më e rëndë. Shumë më e rëndë, që zbulon një gabim tragjik, një faj të rëndë të ndërgjegjes sonë sipas së cilës fëmijët janë prona jonë e patjetërsueshme. Askush nuk mund të ketë të drejtë mbi jetën e tjetrit. Askush dhe Asgjë!

Një punë e mirë për t’u bërë është të mos dëgjohen këto dërdënget e studiove që kush i njeh nga afër e di sesa të frustruara janë edhe me hijen e vet, pavarësisht se predikojnë dhe japin mend për çdo gjë! Xhanëm njësoj si të ashtuquajturit burra!

s.zaimi