Ta trajtosh Shqipërinë si pronë personale. Asnjë informacion mbi pritjen e refugjatëve

Në Shqipëri do të vijnë emigrantë. Sirian, afganë dhe palestinezë. Një gjë e tillë po raportohet nga disa media, ndërkohë që pak ditë më parë RTSh Korça informonte se vetëm për muajin shkurt në zonën e Devollit janë ndaluar 600 emigrantë të paligjshëm. Po kështu raportohet se janë ngritur qendra pritjeje dhe është shtuar numri i kontrolleve policore.

Në media po ashtu qarkullojnë edhe versionet për destinacionin e grumbullimit të refugjatëve për të cilët thuhet se Shqipëria është e gatshme të presë deri në 30 mijë.

Konkretisht ka raportime se qendra grumbullimi do të ngrihen në Pocest të Korçës ku do të strehohen 5 mijë persona, në Krane të Sarandës rreth 1 mijë, në Arshilengo të Gjirokastrës rreth 5 mijë, në Gjadër të Lezhës rreth 5 mijë si dhe në Elbasan nga 5 deri në 10 mijë persona.

Pikat e pritjes dhe grumbullimit do të jenë në Kakavijë, Sopik, Qaf Botë, Rrips, Tre Urat, Leskovik, Shtikë, Kapshticë. Akomodimi i emigrantëve që  vijnë nga Greqia do të bëhet në Korçë, Sarandë dhe Gjirokastër, ndërsa emigrantët që kapen në territorin shqiptar mendohet të kryhet në Elbasan. Ne qytetin e Elbasanit është përcaktuar zona e NSHU si vendodhja e banesave

Ky raportim po kalon në heshtje nga qeveria e Shqipërisë e cila nuk po do të informojë qytetarët e vet për vendimet që ka marrë. Pritja e refugjatëve është pasojë e pozicionit të Shqipërisë, mirëpo nëse shohim vende të tjera aty është vënë në lëvizje ushtria, policia dhe është marrë edhe vendimi për mbyllje kufiri. Po qeveria e Shqipërisë çfarë vendimi ka marrë? Askush nuk e di, sepse askush nuk flet. Ndoshta sepse kryeministri mendon se Shqipëria është pronë e tij, personale me të cilën mund të bëjë çfarë të dojë. Aktualisht në Shqipëri strehohen 3 mijë muxhahedinë iranianë, përmes një vendimi që vendit i është imponuar nga idili me Amerikën. Asgjë reale nuk morëm vesh për këtë vendim. Tani thuhet se do vijnë 30 mijë. Sërish nuk do informohemi?