Siria dëbon BBC-në

Gazetarët e BBC-së nuk do të munden të punojnë më ligjërisht në Siri pasi autoritetet vendase u revokuan akreditimin. Sipas zyrtarëve sirianë, kanali britanik e ka shtrembëruar realitetin në Sisi përmes raportimeve të tij.

"Ka dhënë qëllimisht, herë pas here, informacion subjektiv dhe të rremë, pavarësisht paralajmërimeve të përsëritura nga autoritetet siriane”, tha Ministria e Informacionit në Damask.

Sipas saj, BBC i ka bazuar raportimet e saj në "deklarata dhe dëshmi nga partitë terroriste dhe anti-siriane", duke ofruar kështu “raportime të politizuara dhe mashtruese".

Ndërkohë, BBC nga ana e saj pretendon se gazetaria e saj kishte qenë e paanshme dhe e pavarur.

"Ne flasim me njerëz në të gjithë spektrin politik për të vërtetuar faktet", tha një zëdhënës i BBC, duke shtuar se kanali "do të vazhdojë të ofrojë lajme dhe informacione të paanshme për audiencën në të gjithë botën arabishtfolëse".

Ndërsa Ministria siriane e Informacionit nuk e përmend në deklaratë, BBC pretendon se revokimi i akreditimit të gazetarëve të saj mund të lidhet me një raportim, sipas të cilit presidenti sirian Bashar al-Assad dhe familja e tij janë përfshirë në prodhimin dhe tregtimin e një droge të quajtur Kaptagon.

Në janar, BBC pati një kontradiktë të ngjashme në Indi, pas botimit të një materiali mbi kryeministrin Narendra Modi. Zëdhënësi i Ministrisë së Jashtme indiane, Arindam Bagchi, e përshkroi materialin si një “propagandistik” dhe me "mendësi koloniale".

Nju Delhi urdhëroi YouTube dhe Twitter për shpërndarjen e tij në Indi.